Қазақстанда теңдесі жоқ алып кәсіпорындарымен әлемге танымал болып отырған қала — Екібастұз.
Кеншілер мен энергетиктердің мақтанышы болған шаһарда қара алтын өндіріліп жатыр. Әлемдегі ең биік мұржа да дәл осы Екібастұзда. Жүз елу мыңға жуық тұрғыны бар аймақты түлетіп жатқандардың қатарында Түленовтер отбасы бар.
Биыл сол шаңыраққа 21 жастағы Маржан келін болып түскен.
Отырар ауданы Шәуілдір ауылының тумасы, Оңтүстік Қазақстан педагогикалық университетінің түлегі. Мамандығы бойынша қазақ тілі және әдебиеті пәнінің мұғалімі Екібастұз қалалық білім бөлімінде қызметін атқарып жатыр. Ішкі көші-қон саясаты аясындағы бағдарламаға тіркеліп, мемлекет тарапынан берілетін мүмкіндікті пайдаланып отыр.
Жас жанұяға үбірлі-шүбірлі болуды тілеп, осындағы өзге де түркістандықтармен жүздесуге жол тарттық.
Елімізде электр қуатын өндіріп отырған «Екібастұз МАЭС -2» станциясы ең алып кәсіпорындар қатарында. Ол Екібастұз қаласынан 40 шақырым қашықтықтағы Солнечный кентінде орналасқан. 1500-дей жұмысшысы бар мекемеде Түркістан облысының тумасы жұмыс істеп жатыр.
Арыс қаласынан келген Асқарбек Мұxамедов дәнекерлеуші (сварщик). Тоғыз жолдың торабынан Павлодар облысына қоныс аударған Асқарбектің бұл ісі — нағыз ерлік.
Өйткені жұбайы мен үш баласын оңтүстіктен солтүстікке бір мезетте көшіру екінің бірінің қолынан келмес.
Осындай ерлікке барған жерлесіміздің шаңырағына барып, отбасылық жағдайымен таныстық. Көп қабатты тұрғын үйден пәтер жалдап отырған жанұяның жарқылдаған ақ көңілдері мен кең пейілдеріне таңырқайсыз. Түркістаннан барған біздерді қуана қарсы алып, асыға күткендігін айтты.
