Бүгін Шымкент қалалық мәслихаттың кезектен тыс ХХІХ сессиясы депутат Хусанхан Ахматхановтың төрағалығымен өтті. Сессияға облыс әкімі Ж.Түймебаев, қала әкімі Н.Сауранбаев, қалалық мәслихаттың депутаттары мен қала активі қатысты.Шымкент қаласының әкімдігі мен қалалық мәслихаты Шымкент қаласына республикалық маңызы бар қала мәртебесін беруге ұсыныс енгізу туралы бірлескен шешім бір ауыздан қабылданды. Енді бұл құжат Оңтүстік Қазақстан облыстық мәслихатын сессиясында қаралады.
Қазақстан Республикасының 1993 жылы 8 желтоқсандағы №№2572- ХІІ «Қазақстан Республикасының әкiмшiлiк-аумақтық құрылысы туралы» Заңында республикалық маңызы бар қалаларға — халқының саны бiр миллион адамнан асатын елдi мекендер жатады деп көрсетілген. Мемлекет басшысы өз сөзінде «Қазақстан агломерацияны дамыту стратегиясын жүзеге асыруды бастады. Егер бізде бұған дейін миллион тұрғыны бар тек Алматы қаласы болса, қазір үш мегаполисіміз бар олар Алматы, Астана және Шымкент қалалары».
Халық қалаулыларының алдында сөз сөйлеген Шымкент қаласының әкімі: «Сессияда тарихи құжатқа қол қойылды, бұл Шымкенттің республикалық маңызы бар қала мәртебесін алуда ауқымды жұмыстың бастауы болды», — деп атап өтті.
Республикалық маңызы бар қала мәртебесі жаңа мүмкіндіктерге жол ашпақ. Мұндай өзгеріс қаланың дамуына, сондай-ақ әрбір тұрғынына да оң әсер алып келеді.
