Сенбідегі қолға алынған келелі іс. Әдеттегідей жұмыс аптасының аяқталған тұсында әкімдіктегілер демалысқа кетіп емес, маңызды кездесуде мәмілеге келуді жөн көріпті. Облыс басшысы Бейбіт Атамқұлов, бірінші орынбасары Дархан Сатыбалдымен бірге, облыстық мәслихат хатшысы Қамытбек Айтөреевтер жергілікті сот билігінің өкілдерімен кездесіп, медиация туралы меморандумға қол қойды. Ежелден халқымыз бітімгершілік арқылы көптеген мәселені дер кезінде шешіп отырғандығын ескерсек, бұл саланың соңғы уақытта жұмысы жанданып келеді. Өңір тұрғындары үшін де оңтайлы шешімнің қабылданып жатқан тұсы бар.
Оңтүстік Қазақстан облыстық сотының алдымен мүмкіндіктерімен танысқан билік өкілдері сот ісі жүргізілетін отырыс залдарын аралап шықты. Толығымен бейнебақылау жүйесі орнатылған арнайы орындарды төрағаның экран арқылы бақылауына да болады. Бұл ашықтық пен жариялылықтық бірден бір негізі. Ел тарихы мен сот ізінің жалғаушысы болған мәліметтер екінші қабаттағы мына мұражайда сақталынады. Қоғамдағы жанжал деңгейін төмендетуге бағытталған медиацияны алғаш болып қолға алған да оңтүстікқазақстандықтар. Дауларды сотқа дейін реттеу, татуласу рәсімі көпке қуаныш сыйлап жатқан жағдайы бар. Қариялардың бітімгершілігі мен билер алқасының шешіміне салатын көшпелі қазақтың тарихындағы қайбір тұсын алып қарасаңыз да ынтымақпен бірлікті көксеген. Бүгін міне, сол кезеңнің жалғасын жандандыру ісі қолға алынбақ. Қазыналы қарттардың рөлін арттырып, қызметтен зейнетке шыққан заңгерлердің назарын жұрт тыныштығына аудару міндеті тұр. Медиация тәртібін дамытуда үздік деп танылған түркістандық судья бітімгершіліктің бүтін үлгісін көрсетіп отыр. Еліміз бойынша ең үздік медиатор қылмыстық істерді қарауда көпке үлгі дейді облыстық сот төрағасы.
Өз кезегінде мінберге сөз алуға шыққан облыстық сот жанындағы Соттармен өзара іс-қимыл жөніндегі кеңес мүшесі Хасан Бациев Меморандумды қолдайтындығын жеткізді. Және бұл бағыттағы жұмыстар оң нәтиже беретіндігіне сенімді. Енді, екіжақты түзілген меморандумда көрсетілгендей әр тарапты мақсаттар мен міндеттердің жүзеге асырылуы әкімдік пен сот қызметкерлерінің ынтымақтастығын арттырып отыр. Сөзге аса мән беріп, кез келген жұмыстың қиындығына дендеп ене білетін облыс әкімі Бейбіт Атамқұлов судьяларға дем берді. Яғни, істің барысын жіті зерттеп, шешім шығару оңай еместігін алға тартты. Басқосуда белгілі болғандай, Оңтүстікте соңғы 6 ай ішінде азаматтық 332 іс қаралып, бітімгершілікпен шешілген екен. Ендігі міндет, Елбасының тапсырмасына сәйкес, медиацияны әлемдік стандартқа сәйкестендіру қажеттілігі тұр.
Салтанат Тойболова
