Бүгін облыс әкімінің тапсырмасына орай қала әкімі Ғабидолла Әбдірахымов Шымкент қаласы аумағында салынған балабақшалардың жағдайымен танысты. Әуелі, №60 «Тараз» бөбекжай балабақшасы, №61 «Нұртас» бөбекжай балабақшасы және №62 «Ботақан» бөбекжай балабақшасында болып, Елбасының тікелей бастамасымен қолға алынған «Балапан» бағдарламасының қаламыздағы орындалу деңгейін көзбен көрді. Атап айтар болсақ, құрылысы 2014 жылы басталан бұл 3 балабақшаның үшеуі де 320 орынға лайықталып салынған. Аталған бөбекжайлар алдағы 1 маусым балаларды қорғау күні мерекесіне орай пайдалануға берілмек.
Қала халқының артуына орай балабақшаға баратын тәрбиеленушілердің саны көбейе түсуде. Осыған орай, Шымқалада жаңа бөбекжайлар көптеп салынып, ел игілігіне берілуде. Естеріңізге салар болсақ, өңір басшысы Шымкенттегі мектеп жасына дейінгі балаларды оқыту және тәрбиелеу ісін жетілдіруді тапсырған болатын. Облыс әкімінің тапсырмасының орындалу барысына тоқталған шаһар басшысы жоспар бойынша алдағы уақытта қала аумағында жасөскіндерге арналған бөбекжайлардың қатары көбейетіндігін жеткізді. Сонымен қатар, Ғ.Əбдірахымов бөбекжайлардың айналасындағы көшелердің сапасына баса мəн беруді тапсырды.
