Зиянкес жәндіктермен күресті облыс әкімінің өзі қадағаламақ

Бүгін өңір басшысының төрағалығымен шегірткеге қарсы күрес шаралары жөнінде аудан, қала  әкімдерімен шұғыл селекторлық жиын өтті. Аталған мәжіліс Оңтүстік өңірінде зиянкес жәндіктердің көптеп пайда болуына орай ұйымдастырылып отыр. Жиында аймақ басшысы өзінің жауапты орынбасары С.Тұяқбаевтың, облыстық ауыл шаруашылығы басқармасы басшысы мен ҚР АШМ агроөндірісті мемлекеттік инспекциялау комитетінің аймақтық инспекция басшысының атқарылған жұмыстар жөніндегі баяндамасын тыңдап, өңірде шегірткенің жаппай таралып кету қауіпі бар екенін қатаң ескертті.  Селекторлық жиында Сарыағаш, Шардара аудандары мен Арыс қаласы аумағында шегіртке ошағының пайда болуы және оны шұғыл түрде жою жолдары талқыланды. Жауапты сала басшыларының есебін тыңдаған аймақ басшысы облыстық деңгейде шегірткеге қарсы күресу жүйесі толық қалыптаспағанын, соның салдарынан егістік алқаптарына қауіп төніп тұрғанын жеткізді. Бүгінгі таңда күнгейлік шаруаларды саяқ шегірткелердің көбеюі алаңдатып отырғанын айтқан облыс әкімі дер кезінде жұмысты жүйелеп, тиісті шаралар қабылдамаған Сарыағаш ауданы әкімінің тиісті орынбасары мен бөлім басшысын жұмыстан босатылуын ұсынды. Ал Арыс қаласы мен Шардара ауданының әкімдеріне мәселені бір апта көлемінде шешпеген жағдайда тиісті шаралар қабылданатынын ескертті.  Облыс әкімі барлық аудан, қала әкімдері өз деңгейінде шұғыл шараларды қабылдап, алдын алу жұмыстарын ұйымдастыруды және орын алып отырған жағдайды түзетуге бір апта уақыт беретінін айты. Сондай-ақ, атқарылған жұмыстар бойынша күнделікті баяндап, апта сайын мониторинг жүргізуді тапсырды. Мәжілісте мәлім болғандай, Сарыағаш ауданында зиянкестер таралуының алдын алу бойынша әуе техникасымен залалсыздандыру жұмыстары жүрзіледі. Осы жылы шегірткеге қарсы күрес шараларына облыстық және республикалық бюджеттен жалпы 138 млн. теңге қаралып, облыс бойынша 118 мың га құрайтын аумақ өңделетін болады. Бүгінгі күнге жоспарланған 91,44 мың гектар жердің 81,71 пайызы дәріленген.