Қаладағы ретсіз сауда мәселесі сараланған жиын

Шымкент қаласы әкімдігінде ретсіз сауда мәселесі және жылу беру маусымын қорытындысын талқылауға арналған мәжіліс өтті. Онда қала әкімі Ғабидолла Әбдірахымов тиісті сала басшыларының баяндамасын тыңдады. Қала әкімінің орынбасары Нұралхан Көшеров қаладағы ретсіз сауда орындарының алдын алу, жою жұмыстарының барысы туралы баяндады. Қала аумағында ретсіз сауда орындарының негізгілері анықталып, биыл іс-шара жоспарына сәйкес 92 рейд жұмысы ұйымдастырылды. Жыл басынан бері қалада 36 дүңгіршек алынды. Қаңтар-наурыз айларында жергілікті полиция қызметі тарапынан 1352 әкімшілік-хаттама толтырылған. Жалпы 1 миллион 733 мың 917 теңге айыппұл салынды– деді қала әкімінің орынбасары. Дегенмен, әлі де жұмысты жандандыру керек. Мәселен, Абай ауданында «Бекжан», «Алаш», «Автонұр», «Сейхун» базарының маңында, Әл-Фараби ауданы бойынша «Қырғы базар», «Қазына» сауда орталықтарында, Төлеби, Әйтеке би, және Қазыбек би көшесі бойында әлі де атқарылатын жұмыстар бар. Ал Еңбекші ауданында Ш. Уәлиханов, «Сайрам», Қойгелді батыр, Ж. Аймауытов және Ж. Адырбеков көшесін де тәртіпті күшейту керек.
2016-2016 жылғы жылу беру маусымының қорытындысы жайын баяндаған қала әкімінің орынбасары Бейсенбек Жанбосынов тұрғындар тарапынан арыз-шағымдардың азайғанын мәлім етті. Оның айтуынша, «Солтүстік», «Шығыс», «Сайрам» шағынауданындағы жылу жүйелерін жаңғырту баста назарда тұр. Мәжілісте қала тұрғындары жылу орталықтарына 994 млн теңге қарыз екені де мәлім болды. Ғ. Әбдірахымов бұл мәселені бір келісімге келіп, шешу керектігін айтты.