Шымкентте 25 наурыздан бастап жылу беру маусымы аяқталды. Жаз мезгілінде «Шығыс», «Теріскей», «Сайрам» және 18 шағынаудандарындағы 220-ға жуық көпқабатты үйге ыстық су берілмейді. Бұл – келесі жылыту маусымына дайындық шараларына байланысты қолға алынған жұмыс. Мұны Шымкент қаласы әкімінің орынбасары Бейсенбек Жанбосынов БАҚ өкілдеріне арналған брифингте мәлім етті.
— Биыл қаланың солтүстік бөлігіндегі Н. Төреқұлов көшесінде құбырды жаңғырту мақсатында ұзындығы 6,5 шақырымдық жұмыс атқарылмақ. Республикалық бюджеттен қаражат бөлінген. Құрылыс жұмыстарына байланысты биылғы жаз маусымында аталған шағынаудандарда ыстық су қосылмайды. Бірақ, осы айдың 15-не дейін ыстық су беріледі. Сондай-ақ, ҚР қолданыстағы заң бойынша бес қабатты тұрғын үйлерден жоғары қабатты үйлерге автономды жылу қазандығын қоюға рұқсат етілмейді. «Нұрсәт» шағынауданында он үйге жасаған талдау жұмысы көрсеткендей, 669 пәтердің 75-і бүгінде автономды жылыту жүйесіне рұқсат келісім-шартқа өтіп кеткен. Осы жылу қорытындысы бойынша ол үйлердің бәріне ескерту ілінді. Өткен жылыту маусымында екі төтенше жағдай орын алған болатын. Қайғылы оқиғалар да кезікті. Солардың алдын алу мақсатында ескерту жұмыстарын жасадық, – деді Б. Жанбосынов. Жалпы, қала бойынша жылу энергиясын орталықтан алатын бүгінде көпқабатты үйлердегі 84 мың пәтер болса, оның 17-18 мыңы автономды жүйеге өтіп кеткен. Оның көбісі заңсыз. Қазір осы абоненттердің барлығы мемлекеттік меншіктегі мекеменің балансқа өткену туралы талдау жасалды. Бәрінің мекен-жайы белгілі. Осы жылу энергиясының орталықтандырылған жүйелерін қайта қалпына келтіру жұмыстары атқарылады. Соған сай тұрғындар арасында түсініспеушіліктер болуы мүмкін. Тек бұл заң аясында атқарылып жатқан жұмыстар екенін тұрғындар түсінуі тиіс. Брифинг барысында қала әкімінің орынбасары жыл басында «Оңтүстік» шағынауданындағы кәріз жүйесінде апатты жағдай орын алған үйлердің мәселесіне тоқталып өтті. Аталған мәселеге Бейсенбек Керімбекұлы заңға сәйкес, тұрғындарға толыққанды жауап берді.
— Апатты үйлерге қатысты жұмыстар заңға сәйкес жүргізілген. Алайда ол үйлерді жөндеу жұмыстарын жасауға тұрғындардың өздері келісім бермеді. Қазір кәріз жүйесінде жөндеу жұмыстары атқарылып болды. Ол жерде тұрғындарға қауіп төніп тұрған жоқ, – деді қала әкімінің орынбасары.
Шымкент қаласы әкімдігінің баспасөз қызметі
