2016 жылды «Дін және тарих тағылымы» жылы деп жарияланған Қазақстан Мұсылмандары діни басқармасы осыған сәйкес биылғы жылы бірқатар іс-шаралар жоспарын әзірлеген. Соның бірі ретінде бүгін облыстық орталық мешітте кеңейтілген семинар ұйымдастырылды. Ал семинар жұмысына арнайы келген еліміздің Бас Мүфтиі Ержан қажы Маямеров, облыс әкімінің орынбасары Ербол Садырмен бірге алдымен мешіт аумағына жас ағаш көшеттерін отырғызды. Яғни көктем мезгілінің шуақты күнінде өңірімізге табан тіреген Ержан Малғажыұлы сауабы мол игі істің ұйытқысы болды.
Ал мұнан соң Бас мүфтидің төрағалық етуімен кеңейтілген семинар өз жұмысын бастады. Келелі басқосуға Қазақстан Мұсылмандары діни басқармасы жанынан құрылған «Ғұламалар кеңесінің» мүшелері және облыстың 850-ге жуық имам молдалары және медрессе ұстаздары да қатысты. Семинар барысында діни басқарманың 2015 жылы атқарған жұмыстары бойынша арнайы бейнефильм ұсынылып, жасалған жұмыстар жан-жақты сөз болды. Сондай-ақ, имамдардың біліктілігін арттыру, жоғары оқу орындары, медресселер мен мешіттер жанындағы сауат ашу курстарының бағдарламаларын жетілдіру мәселелері де талқыланып, мұсылмандықтың дәстүрлі жолы бойынша мақсатты түсініктемелер берілді.
Сондай-ақ, семинар барысында Қазақстан Мұсылмандары діни басқармасы жанынан 2009 жылы құрылған Ғұламалар кеңесінің мүшелері де баяндама жасады. Аталмыш кеңестің мақсаты ислам негіздеріне сүйене отырып, қоғам өмірінде мұсылмандық ұстанымға қатысты туындап отырған өзекті мәселелерде пәтуалар шығарады. Басқарманың жалпы қызметі жүйесі және оның имамдары қызметінің негізгі бағыттарын зерттейді. Уағыз тақырыптары мен жұма уағыздары мәтіндерін бекітеді. Міне осындай маңызды міндетті жүзеге асырушы ғұламалар кеңесінің өкілдері де жиында орамды ойларын ортаға салды. «Дін және тарих тағылымы» тақырыбын арқау еткен семнар барысында бірқатар баяндамалар жасалып, ұсыныс пікірлер айтылды. Ал семинардың кезекті отырысы 30-31 наурыз күндері Сайрам ауданында өз жалғасын таппақ.
Абай Омар
