Шымкент қаласындағы Өтегенов көшесі мен қиылысқан Дархан көшесін тағы да су шайып кетті. Қошқар ата өзенінің жағалауында орналасқан бұл көше алғашқы рет қызыл судың астында қалып отырған жоқ. Жыл сайын көктем мен күзде жандарын шүберекке түйіп отыратын жұртшылық көктем кылаң бере қамдарына кірісуде. Мұндағы төтенше жағдайға байланысты дабыл қағылып қалалық шұғыл қызметтер көмекке келді.
Қошқар ата өзенінің арнасынан асуы алғаш рет орын алып отырған жоқ. Қаңтардың басында біраз елді әбігерге салған оқиғаға байланысты шұғыл іс-әрекеттер жүргізілгенмен, қауіп әлі сейілген жоқ. Табиғат тосын мінез танытса, қатерге душар болатын жергілікті халық өзекті мәселенің тездетіп шешілуін қалайды. Осы мақсатта «Көктем – 2016» республикалық оқу жаттығу жұмыстары жүргізілді. Төтенше жағдайға байланысты пысықталған бұл жұмыстар кауіптің бетін біршама бері қаратуға тырысты. Шұғыл түрде іс әрекетке көшкен құтқарушылар алдымен су басқан үйлердің тұрғындарын оқшаулап, Қошқарата өзеніне абайсызда түсіп кеткен бір азаматты құтқарды. Үлкен көпірдің қоқысқа толып бітелуге шақ қалған көздерін ашуға техникалар мен қатар қала тазалығына жауапты мекеме қызметкерлері де атсалысты. Ернеуінен асқан өзен суын арықтарға бұрылып, жағалаулар нығайтылды. Күн жылынып қарқынды жауын-шашын түсе қалса, бойларын қорқыныш билейтін тұрғындар өз беттерінше әрекет жасап жатқандарын айтады. Алайда, біздің жағдайымызды өзгелер де түсініп бақса екен дейді. 
Қаладағы қауіпті аймақ саналған орындарға сенбіліктер өткізуді жоспарлап отырған төтенше жағдайлар департаменті тұрғындардың тазалықты сақтауларын да қатаң ескертеді. Апаттың айтып келмейтіні тағы бар.
Гүлнәр Асқарқызы
