Шымкент қаласының әкімі Ғабидолла Әдірахымовтың төрағалық етуімен әкімдіктің кезекті мәжілісі өтті. Күн тәртібінде шахардың 2015 жылғы әлеуметтік –экономикалық дамуының қорытындылары және 2016 жылдың негізгі міндеттері талқыланды. Айта кету керек, қаланың жалпы әлеуметтік дамуын сипаттайтын негізгі көрсеткіштерде өсім байқалып отырғанымен Шымкентте қылмыс саны азаймай тұр. Қала әкімінің төрағалық етуімен өткен мәжілісте алғаш болып Шымкент қалалық Экономика және қаржы бөлімінің басшысы Рахымберді Мулкеманов баяндама жасады. Оның айтуынша өткен жылдың қорытындысы бойынша шахардың жалпы әлеуметтік дамуын сипаттайтын негізгі көрсеткіштерде өсім бар. Мәселен, былтыр жергілікті халық саны 884 мың 100 адамды құрап 2014 жылмен салыстырғанда 24,7 пайызға өскен. Ал өнеркәсіп өнімінің көлемі 289 млрд 100 млн тенгеге жетіп 3,7 пайызға артып отыр екен. Сондай-ақ ауыл шаруашылық саласының үлесі де 9 пайызға артып отырған жайы бар.
Десе де бұл көрсеткіштер көңіл қуантарлық жағдайда болғанымен Шымкентте қылмыс саны азаймай тұр. Мәселен есепті кезеңде ақша бопсалау 60,2 пайызға, алаяқтық 47,7 пайызға өскен. Оған қоса 2015 жылы 1100 жол көлік оқиғалары тіркелсе, онда 106 адам қаза тауып 1400 ден астам азамат түрлі дене жарақаттарын алған. Алайда қаламызда азаймай тұрған қылмыстық оқиғаларға байланысты Шымкент қалалық Ішкі істер басқармасының бастығы Арман Бейсенбаевтың өз айтары бар. Ішкі істер басқармасы бастығының жауабынан соң қала әкімі шахардағы жол ережесін өрескел бұзып жүрген той кортеждеріне қатысты өткір сын айтты. Яғни негізгі көшелерде жол қозғалысына кедергі келтіріп заң талаптарын сақтамайтын той көліктерінің әрекеті қала әкімінің ашуын тудырып отыр. Осылайша өрбіген мәжілістің күн тәртібіндегі екінші мәселе қаланың 2015 жылға арналған бюджетінің атқарылу қорытындысы болатын Бұл бойынша да баяндама жасаған эконмика және қаржы бөлімінің басшысы былтырғы жылы салық түсімдерінің артығымен орындалғандығын атап айтты. Ал бюджет қаржысын игеруге келгенде 83 млрд 404млн тенгенің 145 млны игерілмей қалған. Сонымен қатар Шымкент қалалық құрылыс бөлімі өткен жылға тиесілі екі жобаға мемлекеттік сараптама құжаттарын ала алмаса. Тұрғын үй коммуналдық шаруашылық бөлімі де 2 жобаның ЖСҚ әзірлеп үлгермеген. Осы және өзге де мәселелер сөз болған жиын соңынан қала әкімі тиісті бөлім басшыларына бірқатар нақты-нақты тапсырмалар жүктеді.
Абай ОМАР
