Оңтүстік Қазақстанда жыл қорытындысы бойынша әр салада жемісті еңбек еткен, халыққа сапалы қызмет көрсетуде абырой биігінен көрінген азаматтарға «Жыл үздігі» номинациясы табысталды. Жиынға қатысқан аймақ басшысы Бейбіт Атамқұлов жыл бойы атқарған істі електен өткізіп, сол жолда жемісті еңбек еткен азаматтар мен еңбек ұжымдарын 39 аталым бойынша марапаттады. 
Оңтүстік Қазақстан облысы республика бойынша барлық салада жоғарғы көрсеткіште танылып келеді. Ауыл шаруашылығы, спорт, мәдениет, білім мен денсаулық сақтау салалары да өңірлер арасында топ жарып жүр. Инвестицияны икемдеп, кәсіпкерлерді бірге жұмыс жасауға шақырып, өңір экономикасын арттыруда да жұмыстар жүйелі. Бүгінде халықтың тұрмыс-тіршілігі де түзелген. Өңірдің дамуы жолында атқарылған бұл жұмыстар әрине ел азаматтарының еселі еңбегі. Яғни маңдай термен еткен еңбектің жемісі. Тек еңбек етіп қана қоймай шаруаны еселендіріп, қайта жігерлену үшін марапаттау игі іс. 
Оңтүстіктің сан саласында еңбек еткен 39 номинацияның арасында «Жылдың үздік журналисі» әріптесіміз, «Оңтүстік Қазақстан» облыстық қоғамдық-саяси газетінің бөлім меңгерушісі Серікқали Жексенбай мен «Үздік жазушы» аталмыш басылымның бөлім меңгерушісі Жеңіс Бахадүрге бұйырды. Бұқара мен билік арасында алтын көпірге айналып, халық мұңы мен мұқтажын жеткізуші, билік тарапынан атқарылған әр игі істің жалғаушысы болып жүрген бұл азаматтардың еңбегі марапатқа лайық-ақ.
Ал, «Жылдың үздік медицина мекемесі» номинациясы облыстық клиникалық ауруханасына табысталды. 140 жылдан аса тарихы бар медициналық мекеме аймақтың барлық тынысының куәсі. Бүгінде замануы техникамен білікті дәрігерлермен толыққан. 
Мұнан бөлек, бұл күні «Жылдың үздік суретшісі» Баймен Батухан атанса, ғылым саласында үздіксіз еңбек еткен Қ.Яссауи атындағы Халықаралық Қазақ — Түрік университетінің экология ғылыми зерттеу институтының директоры Аманкүл Ақбасова «Үздік ғалым» атағын иеленді. Ал шәкірт тәрбиелеу жолында бар ғұмырын арнап, оларды үлкен өмірге қанаттандырып жүрген Бәйдібек аудандық Бөген жалпы орта мектебінің ұстазы Жанар Бастарова «Жылдың үздік ұстазы» болды. Ауыр атлетикадан Әлем чемпионатының күміс жүлдегері Жазира Жаппарқұлдың да еңбегі еленді. Яғни Қазақстан абыройын байрақты бәсекелерде асқақтатып жүрген қазақ қызы «Жылдың үздік спортшысы». Құрылыс саласында оқ бойы озық шығып, Оңтүстіктегі зәулім ғимараттардың бой көтеріп, шаһардың сәулеті мен дәулетінің артуында жұмыс жасап жүрген «Отау строй» ЖШС — «Үздік құрылыс мекемесі» атанса, «Үздік құрылысшы» номинациясы «Тур ахмет және К» ЖШС-нің учаске бастығы Ерғали Құлажановқа бұйырды. Ал «Жылдың үздік ауылын» Түлкібас ауданының Керейіт ауылы иемденді. 
Тарихи терең, шежірелі де қазыналы аймақтың барлық игі жақсылары мен жайсаңдары қатысқан жыл үздіктерін марапаттау кешінің соңы концерттік бағдарламаға ұласты. Оңтүстіктің өнерпаздары көрерменге әсем ән мен жырдан шашу шашты. Ал табысы мен жақсылығы мол, қуанышы мен жетістігі зор болған 2015 жылдың үздіктерін марапаттау кеші осылайша өз мәресіне жетті.
Еңлік Заманхан
