Өңірімізде алғаш рет «Оңтүстік» Футбол Академиясы ашылды. Яғни еліміздің негізгі құрамасына болашақ ізбасарлар тәрбиеленетін бұл орын Қазақстанда өз жұмысын бастаған бірінші футбол академиясы атанып отыр. Еліміздегі футбол федерациясының бастамасы негізінде облыс әкімдігі тарапынан қолдау тапқан оқу жаттығу орталығының Тұңғыш Президент күні мерекесінде салтанатты түрде лентасы қиылды. Осы орайда айтулы шараға Қазақстан Футбол федерациясының Президенті Ерлан Қожағапанов, облыс әкімінің бірінші орынбасары Дархан Сатыбалды және де белгілі спорт қайраткерлері арнайы қатысты. Еліміздің негізгі құрамасында өнер көрсетіп жүрген футболшылардың ізін басатын жас аяқдопшыларды тәрбиелеу мақсатындағы тұңғыш футбол Академиясы Шымкент қаласында ашылып отыр. Қазақстан футбол федерациясының бастамасы негізінде Облыс әкімдігі тарапынан қолдау тапқан бұл жоба мемлекеттік және жекеменшік әріптестікті дамыту шараларына сәйкес жүзеге асырылған. Яғни Шымкент қаласының Тассай мөлтек ауданында орналасқан «Биік» спорт кешені ішінде ендігі жерде еліміздегі алғашқы футбол академиясы жұмыс жасайтын болады. Осы ретте Тұңғыш Президент күніне орай салтанатты түрде ашылған кешенге арнайы келген Қазақстан Футбол федерациясының Президенті Ерлан Қожағапанов, облыс әкімінің бірінші орынбасары Дархан Сатыбалды және де белгілі спорт майталмандары салтанатты түрде футбол академиясының лентасын қиды.
«Оңтүстік» Футбол академиясында 10 мен 14 жас аралығындағы жас аяқдопшылар тәрбиеленеді. Бүгінгі күні мұнда Қазақстан футбол федерациясымен келісім бойынша Испанияның «Барселона» футбол мектебінің бес жатықтырушысы жұмыс жасауда. Олар мұнда келгелі Оңтүстік аймақтарын аралап 600-ден астам баланы іріктеуден өткізіп үлгерген. Нәтижесінде үздік деп танылған 65 бала жас ерекшеліктеріне қарай үш топқа бөлініп жаттығуларын бастап кеткен. Ол үшін футбол академиясында барлық жағдайлар қарастырылған. Яғни футбол алаңдарынан бастап жас спортшылар қажетті спорттық киім кешектермен қамтамасыз етіледі.
Сондай-ақ, олар мұнда тегін тамақтанып ыңғайлы жатын орындарына жайғастырылған. Ал бұл шығындардың барлығын қаржыландырып отыруды Қазақстан Футбол федерациясы мен облыс әкімдігі бірлескен түрде жүзеге асырып отырмақ. Аталмыш заманауи үлгідегі футбол академиясына қаңтар айынан бастап 2004 жылы туылған 22 бала қатарға қосылмақ.
Ал 2017 жылдан бастап мұнда жыл сайын бір топтан қосып отыру жоспарланған. Олар мұнда білікті жаттықтырушылардан мол тәжірибие жинақтап, жиі жиі футбол додаларына қатыстырылып отырады екен. Осы ретте «Оңтүстік» Футбол академиясының ашылу салтананатында сөз алған спорт қайраткерлері жас аяқдопшылардың алдағы қадамдарына сәттілік тіледі. Айта кету керек, бүгінде футбол академиясына іріктеуден өтіп қабылданған жас футболшылар болашақта Қазақстанның Ұлттық құрамасында өнер көрсетуге мүмкіндік алмақ.
Абай ОМАР
