Өңіріміздегі бірегей әскери оқу орны, Кеңес Одағының батыры С. Рақымов атындағы республикалық әскери мектеп-интернатында, 24-қараша күні түнде оқыс оқиға орын алды. Аталмыш білім ұясында оқитын бір топ оқушылардың арасында жаппай төбелес ұйымдастырылған. Бейресми деректерге сүйенсек, жанжал 2 құрылымның курсанттары арасында туындапты. Ішкі ережесі қатаң тәртіптен тұратын оқу орнында бұзақылық, денеге жарақат салу деген құқықбұзушылықтар болған. Бұл – әскери мектептің тәртібі босаңдағынын және оқушылардың күн тәртібіне бағынбағанын аңғартады.
Тәртіп сақшыларының араша болуымен ғана тиылған төбелестің салдарынан бірнеше бала жарақат алған. Жас ерекшелігіне қарай, 15 жастан асқан 6 жасөспірім Шымкент қалалық №2 жедел жәрдем ауруханасына әкетілсе, 14 жастағы 4 баланы алған жедел жәрдем көлігі Облыстық балалар клиникалық ауруханасына жол тартты.
С. Рақымов атындағы республикалық әскери мектеп-интернаты облыс қана емес, ел көлеміне танымал оқу орны десек те болар. Яғни, білім ошағы мемлекетіміздің қуатты әскерін қалыптастыратын сарбаздарды, әскери ЖОО-на түсу үшін шыныққан, сауатты жігіттерді дайындауды мақсат етеді. Өкінішке орай, елдің қамын жейтін Едіге болар деген ұландарымыз әзірге тек ұсақ бұзақылықпен ғана шектелгені өзекті өртейді. Мұндағы басты ұстаным — тәртіп болуы тиіс. Тәулік бойы тәрбиелеушілер мен оқытушылардың бақылауында болатын оқушылардың жаппай төбелесуі тәрбие жұмысының терең жүргізілмейтінін айқындайды. Ата-ана балаларын сеніп тапсырған оқу орны мына оқиғадан соң өз міндетін лайықты деңгейде атқарып жатыр дей алмаспыз.
