Жас жұбайлар отау құрған сәттегі қуанышты кезде орын алатын бассыздықтар уақыт өткен сайын белең алуда. Шаңырақ көтерген мерейлі күнде тойлаудың жөні осы екен деп шектен шыққан азаматтардың бұзақы әрекеті, қайғылы жағдайға да апарып соқтырып жатыр. Күздің алғашқы аптасында – ақ, той күнінде Сайрам ауданында қос бірдей жас келіншек атылған қарудың салдарынан қаза тапса, келесі күні Шымкент қаласында жүргізілген тексеру барысында той шеруіндегі көліктен тағы бір қару табылды.
Қыркүйек айының 5-күні Әл-Фараби аудандық ПБ қызметкерлері мен прокуратура органдары Шымкент қаласында «Қауіпсіз қала» атты рейдтік іс-шара жүргізеді. Сағат 17:30 шамасында Дендросаябақ маңында той шеруіндегі көліктер тоқтатылған. Тексеру барысында шеруде жүрген Лексус 570 маркалы автокөлігінен қару табылады. Әзірге мұндай құқықбұзушылық Әл-Фараби ауданы бойынша биылғы жылы алғаш рет тіркеліп отыр. Дегенмен де кейінгі кездері жастардың мақтангершілік үшін қару алып жүруі немесе оны аспанға ату секілді бассыздықтары кездесіп жататыны жасырын емес.
Бүгінде қарудың иесі уақытша қамауға алынған. Ал осы оқиғадан бір тәулік бұрын ғана Сайрам ауданында той шеруінде қайғылы жағдай орын алған болатын. Қызық үшін күйеу жігіттің досы аспанға оқ атпақ болады. Алайда көлік ішінде абайсызда шүріппе басылып кетіп, салдарынан 5 адам жарақат алады. Оның ішінде 23 және 26 жастағы 2 әйел ауруханада есін жимай қайтыс болған. Осы тұста құзырлы орган қызметкерлері қару алып жүру немесе оны ретсіз жерде қолдану заңды белден басумен қатар, қоғамға қауіп тудыратынын ескертеді.
Әбдімүтәлі ЖҰМАШ
