Соңғы жылдары елімізде қанатын кеңге жая бастаған спорт саласында тағы бір жағымды жаңалық. Оңтүстік өңірінде грек-рим, еркін және әйелдер күресінен федерация құрылды. Облыс әкімінің бірінші орынбасары Берік Оспанов төрағалық ететін ұжым жеңіске жеткен алғашқы сайыпқырандарды қабылдап, марапаттау шарасын ұйымдастырды. Федерация құрылғалы алғашқы жеңісті жетістікке жеткен жас буынның балуандары. Олар жуырда өткен Азия чемпионатында қарсыластарының белін қайыстырған сайыпқырандар. Жастар арасындғы біріншілікте алтыннан алқа тағынған Бақдәулет Әлментай есімді жерлесіміз болса, осы жарыста тағы бір саңлағымыз Бауыржан Төребек те күміс жүлдеге ие болған. Сондай-ақ, жасөспірімдер арасындағы еркін күресте Данияр Мелдебек тұғырлы 3-орынға тұрақтапты. Жиын барысында федерация президенті Берік Оспанов балуандарды тырнақалды ірі жеңісімен құттықтап, арнайы қаржылай сыйлықтар табыс етті. Жаңадан құрылған ұжымның құрамы да белгілі. Атқарушы директоры болып Ермек Байдауышов тағайындалса, Вице-президенттер белгілі балуандар Николай Ставицкий мен Марс Ерназаровтар. Бапкерлер құрамына кіл мықты, апайтөс жаттықтырушылар іріктелінген. Марапат иелерінің алдында тұрған ендігі үлкен асу – әлем біріншілігі. Тамыз айында өтетін байрақты бәсекеге тыңғылықты дайындалып жатқан спортшылар, Азиядағы межені дүниежүзінде де қайталасақ деген ойда. «Жоғары жетістіктерге жеткендердің еңбегі міндетті түрде еленеді» — деген Берік Серікұлы, биік белестерден көрінген спортшыларға арнайы стипендия берілетіндігін жеткізді. Жасырын емес, бүгінде спорт саласына елімізде, қала берді облыста көп көңіл бөлінуде. Сондықтан, ұжым төрағасы мемлекеттен жан-жақты қолдау болып жатқан тұста нәтиже көрсету тікелей спортшыларға байланысты екенін де айтып өтті.
Абдумутали ЖҰМАШ
