ШЫМКЕНТ: COVID-19 ВИРУСЫМЕН КҮРЕСУГЕ АРНАЛҒАН 40 ТҮРЛІ ДӘРІ-ДӘРМЕК ҚОРЫ ЖЕТКІЛІКТІ

Шымкент қаласында COVID-19 вирусымен күресуге арналған 40 түрлі дәрі-дәрмек қоры жеткілікті. Оған сыбайлас жемқорлыққа қарсы Департамент қызметкерлері мониторинг жұмыстарын жүргізу барысында көз жеткізді. Дәрілік заттар нақты қанша уақытқа жетеді? Денсаулық сақтау министрлігі хабарлаған наурыз айындағы пандемия толқынына дайынбыз ба?
Шымкент қаласында орналасқан СК «Фармация» ЖШС-де бүгінде 5 млрд. 230 млн. теңгенің дәрі-дәрмек қоры бар. Бірақ, мұнда тек Шымкент қаласының ғана емес Түркістан, Жамбыл және Қызылорда облыстарының да үлесі бар. Мекеме қызметкерлерінің айтуынша қоймадағы жалпы қор бас-аяғы 2 мен 6 ай аралығына жеткілікті. Ал, Денсаулық сақтау министрлігінің бекіткен хаттамасына сәйкес, аталған қоймада COVID-19 вирусымен күресуге арналған 40 түрлі дәрілік заттар толық қамтылған. Бұл жұмыстарға көз жеткізу мақсатында ҚР Сыбайлас жемқорлыққа қарсы-іс қимыл Агенттігінің Шымкент қаласы бойынша Департаментінің мамандары арнайы тексеріс жүргізді.
«Ауызы күйген үрлеп ішеді» демекші, өткен жылдың жазында, яғни коронавирустың өршіген уақытында жеке басының пайдасын ойлағандар дәрі бағасын шарықтатып жібергені әлі ел есінде. Алдағы уақытта дәл осындай олқылықтар қайталанбас үшін «Шымкент-адалдық алаңының» бастамасымен дәріханаларға QR кодтар орнатылған. Ол арқылы кез-келген дәрінің шектік бағасын сол мезетте-ақ анықтай аласыз.
Бүгінде Шымкент қаласындағы ауруханаларда дәрілік препораттардың 1 айлық қоры сақталған. Алдағы уақытта дәріханалардан немесе емханалардан келген барлық тапсырыстар СК «Фармация» қоймасынан уақытылы жеткізіліп тұратын болады.

aigak.kz