Мамандандырылған халыққа қызмет көрсету орталықтарында автокөлікке қатысты барлық қызмет түрлері орталықтандырылған жүйе бойынша көрсетіледі. Мұнда жүргізуші куәлігін алуға, көлікті қайта тіркеуге, көлік салығын төлеуге, мекенжай, медициналық анықтама алуға болады.
Шымкент қаласы бойынша үш бірдей мамандандырылған халыққа қызмет көрсету орталығы бар. 2020 жылдың қорытындысына сәйкес, бір ғана мекемеден 81000 азамат жүргізуші куәлігіне ие болған, сондай-ақ 250 мыңнан астам көлік құралы тіркелгенін №1 мамандандырылған халыққа қызмет көрсету орталығы басшының орынбасары Жандос Дүйсебаев мәлімдеді.
«Жүргізуші куәлігін алу үшін енді небәрі екі сағат уақытыңызды жұмсайсыз. Автокөлік мектептерін бітірмей-ақ, емтихан тапсырып, жүргізуші куәлігін алуға мүмкіндік бар.
Емтихан екі бөлімнен тұрады. Теориялық және практикалық. Арнайы жабдықталған емтихан бөлмесінде сынақ тапсырады. 40 минут аралығында 40 сұрақтың 32-іне дұрыс жауап берген болашақ жүргізуші емтиханнан өтеді. Автодромда жол кедергілері бойынша тәжірибе алмасады. Жүргізуші куәлігін алғаш рет алғанда не жоғалған жағдайда, мерзімі өтіп кеткенде, ата-тегін ауыстырғанда қайтадан алуға болады»,- дейді Жандос Дүйсебаев.
Айта кетейік, көлік жүргузу куәлігіне қатысты қызметтердің бірқатарын Egov.kz сайты арқылы жүзеге асыруға болады. Egov.kz сайтында қызметті қалай алуға болады?
⁃ ЭЦҚ (электрондық цифрлік қолтаңбаны) алу;
⁃ авторизациялау және өтініш беру;
⁃ өтінішке сандық фотосурет және электрондық қолының суретін қосу;
⁃ 1,25 АЕК мөлшеріндегі мемлекеттік бажды төлеу (электрондық үкімет порталында egov.кz арқылы банктік төлем карточкасы немесе есеп айырысу-касса бөлімшелерінде және екінші деңгейлі банктерінде).
