Жаңа заң жобасын қолдайсыз ба?

  Баланы сүндетке отырғызып, тұсауын кесу үшін оның рұқсаты қажет. Ал бір жыныстыларға үйленуге шектеу жоқ. Естіген құлаққа түрпідей тиетін бұл заң жобасына қоғам белсенділері қарсы.
«Тұрмыстық зорлық-зомбылыққа қарсы іс-қимыл» туралы заң  өткен жылдың күзінде мәжлістің алғашқы оқылымынан өткен болатын. Енді жаңадан сайланған депутаттар оны екінші оқылымда қарастырады. Аталған заң қолданысқа енсе, не өзгереді? Ата- аналардың құқығына шектеу қойылатыны рас па?
«Тұрмыстық зорлық-зомбылыққа қарсы іс-қимыл  туралы заң жобасы» өткен жылы мәжлісте қаралып, бірінші оқылымда қолдау тапқан болатын. Бұл заң отбасындағы бала тәрбиесіне тұсау болғалы тұр. Қоғамның қызу талқысына түскен өзекті мәселе қоғам белсенділерін бей жай қалдырмады. «Тұрмыстық зорлық-зомбылық мүлде болмауы керек, дегенмен біз осындай  сылтаумен өздерінің ішкі мәселелерін жауапкершілікпен және өз бетінше шешетін қарапайым отбасыларға заңның араласуына қарсымыз. Біз мораль мен этиканы, отбасылық негіздер мен дәстүрлерді бұзуға, әлсіретуге бағытталған «еуропалық стандарттарды» санасыз көшіруге жол бермейміз» дейді қоғам белсенділері. Аталған заңның кейбір тармақтары құлаққа түрпідей естілетіні жасырын емес. Жаңа заң жобасы отбасылық тұрмыс­тық зорлық-зомбылықпен күресте мемлекеттік басқару органдары мен қоғамдық институттардың, онымен қоса тікелей азаматтардың да отбасы мәселелеріне араласуына жол ашады. Бұл кім көрінген есігіңізді қағып,отбасылық мәселелеріңізге бас сұғады деуге саяды. Қоғам қайраткері, бұған дейін мәжліс депутаты болған Мырзатай Шалахметов аталған мәселе төңірегінде пікірін білдірді.

«Қанымыз қазақ, жанымыз қазақ, дініміз ислам. Қазақтың дәстүріне қарама — қайшы дүниелерге қарсымын. Ешқандай адамның, ешқандай ұйымның қамқамқорлығы ананың аялы алақанын алмастыра алмайды. Осыны естен шығармауымыз керек» — деп келер ұрпақтың келешегі үшін алаңдайтынын жеткізді.

Отан — отбасынан басталады. Ал отбасыңыздың ойраны шықса, мемлекеттің болашағы не болмақ? Қазақта «Енесі тепкен құлынның еті ауырмайды» деген аталы сөз бар емес пе? Баласы бетімен кетсе, тәйт деуге құқы жоқ ата-ананың асыраушыдан айырмашылығы қандай? Жаңа заң жобасы жаңашылдықтың бастамасы емес, күйреудің кебін күйттейтіндей…

Айғақ — ақпарат