Түркістан облысы қоғамдық денсаулық басқармасының басшысы Марат Пашимов Арыс қаласының «Құрметті азаматы» атанды.
2019 жылы маусымның 24-і күні Түркістан облысы Арыс қаласындағы әскери қоймада жойқын жарылыс болып, ел әбігерге салынды. Жарылыс болған сәтте ұлтымызға тән бауырмалдық, мейірбандық, адамгершілік сынды асыл қасиеттер жарқырап көрінді. Қашанда өзгеге көмектескісі келіп тұратын ақ халаттылар бұл жолы да мейірбандықтың асқан өнегесін көрсетті.
Арыс оқиғасы ұлттық болмысымыздың жарқын үлгісін көрсеткені рас. Төтенше жағдай кезінде облыстық клиникалық аурухананың бас дәрігері қызметінде болған Марат Орынбасарұлы жаралылар үшін 200-дей төсек орын әзірлеп, шұғыл түрде алғашқы көмек жасады.
Сондай ақ, жарылыстан кейін зардап шеккен ауруханаларды қалпына келтіруге ат салысты.
Осыған орай, бүгін «Нұр Отан» партиясы Арыс қалалық фракциясының төрағасы Әлімбаев Ерғали Садуақасұлы арнайы Марат Пашимовқа Арыс қаласының «Құрметті азаматы» төс белгісімен марапаттады.
Айта кету керек, былтыр Қазақстан Республикасы Президенті Қасым-Жомарт Тоқаевтың Жарлығымен Марат Пашимовқа «Ерен еңбегі үшін» медалі берілген болатын. Оны Түркістан облысының әкімі Өмірзақ Шөкеев Тәуелсіздік мерекесіне арналған салтанатты жиында табыстаған.
