Санкт-Петербургте «Абай» ақпараттық-мәдени орталығы ашылды

Ресейдің Ұлттық кітапханасында «Абай» ақпараттық-мәдени орталығының ашылуы өтті. Іс-шара қазақтың Ұлы ақыны Абай Құнанбайұлының 175 жылдығын мерекелеу аясында ҚР Мәдениет және спорт министрлігі және ҚР Ұлттық академиялық кітапханасы (ҰАҚ) қолдауымен ұйымдастырылды.Орталық ашық қолжетімділікте жұмыс істейтін Абай шығармаларының және ол туралы басылымдардың көрмесін ұсынады. Мұнда әр келуші ақынның өмірі мен шығармашылығы туралы материалдарды, оның шығармаларының әлемнің түрлі тілдеріндегі еңбектері мен аудармаларын, белгілі абайтанушылар, филологтар мен жазушылардың зерттеулерін, электронды және ноталық басылымдарды, Абай шығармаларының жинақтарын таба алады.Ашылу салтанатына ҚР Санкт-Петербургтегі Бас консулы Бауыржан Досманбетов, ҰАҚ жетекшісі Үмітхан Мұңалбаева, «Ата-Мекен» үкіметтік емес ұйымының басшысы Сәрсенғали Құспанов, сондай-ақ Санкт-Петербургтің ғылыми және шығармашылық интеллигенциясы қатысты.Іс-шара аясында қазақ диаспорасының өкілдері мен жас ақын, «Дарын» Мемлекеттік жастар сыйлығының лауреаты Бекзат Смағұловтың орындауында Абай Құнанбайұлының шығармалары қазақ және орыс тілдерінде шырқалды.

ҚР Сыртқы істер министрлігінің баспасөз қызметі