«Қамқорлықты» қажет етеді

Жыл басында Түркістан облысының әкімі Өмірзақ Шөкеев жариялаған «Қамқорлық» жобасы жалғасын табуда. 2020 жылы — 20 отбасыға қамқорлық. Айғақ телеарнасының ұжымы көмекке зәру, мұқтаж жандарға қолдау көрсету мақсатында игі бастаманы қолға алмақ. Біздің мақсат — ел ағаларын әлеуеті әлжуаз тұрғындардың жай-күйімен таныстыру. Бірінші кейіпкеріміз Түлкібас ауданының тұрғыны көпбалалы, жалғызбасты ана.

Гүлайша Тәжиева осыдан 5 жыл бұрын сал ауруына шалдығып, оң жақ бөлігі икемсіз күйге түскен. Күн көрістің қамымен әрең қозғалады. Басына түскен сынаққа мойымай, бүгінде бес баланы жалғыз тәрбиелеп отыр. Ұлын ұяға, қызын қияға қондырып отырған көпбалалы ананың мектеп жасындағы бір ұл, бір қызы бар.

Кеңес заманынан қалған, апатты жағдайдағы аядай тар үйде күнелтіп отыр. Қабырғасы сөгіліп, әйнектері қираған үйдің шатыры да шіріген. Жамап жасқауға да келмейді.
Өздігінен жөндеу жүргізіп, жаңалауға қауқарсыз қамкөңіл ана жаңа заман талабына сай баспаналы болуды армандайды.

Үй тірлігін жасауға денсаулығы жарамсыз кейіпкерімізге қызы Айжан шамасы келгенше қолғабыс етеді. Көршісі Айсұлу да бос уақытында келіп, қол көмегін беруге асық. Кейіпкеріміздің тағдырласы әрі сырласы Айсұлу Тұрсынқұлова да жалғызбасты, көп балалы ана. Күн көрістің қамымен жасамаған жұмысы, қақпаған есігі қалмаған.

Қолынан келмейтін ісі жоқ. Алайда кәсіп ашып, табыс табуға қаржы қолбайлау болып отыр,- дейді.
Біз Қазақ ақжүрек, кең пейіл, жауын да сүйсінткен жомарт халық емес пе едік? Бірлесе жұмыс жасап, көңілі жарым, көмекке зәру жандарға бақыт сыйлай алсақ, нұр үстіне нұр болары сөзсіз.
Игі іске атсалысып, сауапты іске өз үлесіңізді қосамын десеңіз байланыс нөмірлерін назарларыңызға ұсынамыз. 8701

Айғақ-ақпарат