Онлайн-қабылдаудағы тұрғындар өтініштері ескерусіз қалмайды

Жыл басынан бері қала әкімінің қабылдауында 439 азамат болып, жеке мәселелері бойынша жауабын алған. Ал, әкім орынбасарлары 94 азаматты түрлі мәселелерімен қабылдаған. Жалпы, қазірде 206 тұрғын қабылдау кезегінде тіркеліп тұр. Бұл жөнінде бүгін Рашид Аюповтың төрағалығымен өткен апталық мәжілісте мәлім болды.

Карантин режиміне байланысты апта сайынғы онлайн-қабылдау барысында тамыз айы ішінде қала әкімі 21 азаматты қабылдап, сауалдарына құлақ түрді. Тұрғындар тарапынан жерге қатысты құжаттар заңдылығы, баспана мәселесі, қаржылай көмек, ауыз-су жүйесінің жүргізілмеуі, жұмыссыздық, әлеуметтік көмек мәселелері бойынша сұрақтар түскен болатын. Түскен күннен-ақ, жауапты мамандарға жолданып, қазірде шешімі табылған.

Мәселен, ауыз су жүйесі жүргізілмеген Шипа су аумағындағы тұрғындар үшін «Түркістан-су» мекемесі тарапынан аптасына екі рет арнайы су таситын көліктер арқылы ауыз су жеткізілуде. Тағы бір азамат жұмыссыздық мәселесін шешу мақсатында «Қайтарымсыз грант» арқылы 555 600 теңге қаржылай грантқа қол жеткізді. Сондай-ақ, кей азаматтарға Атаулы әлеуметтік көмектің бас тартылуының себептері мамандар тарапынан түсіндірілген.

Естеріңізде болса, 22 тамыз күні 213 азамат жеке мәселелері бойынша «Ақжайық» музыкалық мектебінде әкім қабылдауында болған еді. Олардың өтініштері бойынша карталар толтырылып, қазірде жауапты бөлімдерге жіберілген. Мұндағы түскен сауалдар бойынша Түркістан қаласы әкімдігінің «Жұмыспен қамту және әлеуметтік бағдарламалар бөлімі», «Адами капиталды дамыту бөлімі», «Бизнесті қолдау және туризм бөлімі», «Жер қатынастары» және басқа бөлімдер жұмыс жасауда.

#ХалықтықӘкімдік