Селдің сергелдеңі. 13 мамыр күні түстен кейін жауған жаңбыр Түркістан облысының Төлеби, Қазығұрт, Бәйдібек, Сайрам аудандарында жұртты әбігерге салды. Табиғаттың тосын мінезі бір-ақ күнде шығын алып келді. Нақтырақ айтсақ, Төлеби ауданына қарасты Қасқасу өзені суының ағысы 4 бірдей көпірді шайып өтті.
Тау бөктерінде тұратын Қасқасу ауылдық округі тұрғындарының баспаналары су арнасынан биікте орналасқан. Дегенмен, Түркістан облыстық төтенше жағдай департаментінің мәліметіне сәйкес, Қасқасу өзенінде су деңгейінің көтерілуінен 4 үй, 376 аула аумағын су басты. 8 ірі қара және уақ мал суға батқан. Ал, Екпінді ауылында 4 үйді және 15 үй ауласын су басты. Ауыл ақсақалдары дәл осындай селдің қарқыны 40 жыл бұрын яғни, 1980 жылы болғандығын айтуда.
Аудан орталығы тұрғындарының баспанасын су алғандар эвакуацияланды.
Дәл осы жаңбырдың салдарынан Төлеби ауданына қарасты Киелітас ауылдық округінің екі бірдей елді мекенін су басты. Толассыз жауған жаңбыр мен таудан аққан судан зардап шеккен төлебиліктер баспаналарын тастауға мәжбүр болды. 13 мамырда түнгі сағат 22:00 шамасында эвакуацияланды. Қатты зардап шеккен Сұлтан Рабат елді мекеніндегі 150 тұрғын үй Сауран көшесінде орналасқан. Бауыржан Омарбековтің төрағалығымен жедел штаб құрылды деп мәлімделді. Әлеуметтік желі арқылы ести сала барған болатынбыз. Өкінішке орай, БАҚ жиынға қатыстырылмады. Себебі белгісіз. Жалпы, Төлеби ауданындағы өзендердің су деңгейі көтеріліп, арық-атыз, қыр-сайлардан жиналып аққан жаңбыр суынан 6 елді мекендегі 215 тұрғын үйлердің ауласына су кірді. Атап айтқанда: Ленгір қаласында-20, Ынтымақ елді мекенінде-28, Екпінді елді мекенінде-21, Достық елді мекенінде-17, Сұлтан Рабат елді мекенінде-129 үйдің ауласын су басқан. Сұлтан Рабат елді мекенінің 78 тұрғыны Ленгір қаласында орналасқан №8 кәсіптік колледждің жатақханасына жайғастырылған. Қиын қыстау кезде аудан жастары да көмек көрсетуде. Бірі азық-түлік жеткізсе, бірі тасымалдауға мәселесіне үлес қосуда.
14 мамыр күні Түркістан облысының әкімі Өмірзақ Шөкеев Төлеби ауданының тұрғындарымен кездесті. Сел жүріп өткен аймақтарды аралап, халық барлық қажеттілікпен қамтамасыз етілетіндігін жеткізді. Көмекке Сайрам, Қазығұрт аудандарынан мамандар жұмылдырылады.
