Шымкентте ерекше мерекелік концерт өтті. Яғни, мәдениет саласының қызметкерлері соғыс ардагерлері тұратын аулаларға барып, ән шырқады. Үшінші мегаполисте 40 Ұлы Отан соғысының ардагері бар. Бірақ, көпшілігінің денсаулығы сыр беріп, үйден шығуға мүмкіндігі жоқ. Сонда да, болса өнерпаздар көңіл-күй сыйлап кетті.
Жыл сайын 9-мамыр күні еліміздің барлық аймағында концерттік бағдарламалар қойылып, алаңға шеруге шығатын. Биыл карантинге байланысты Жеңістің 75 жылдығы өз деңгейінде аталып өтуге мүмкіндік жоқ. Бірақ, Шымкент қаласындағы Мәдениет басқармасы қарап жатпай ерекше іс-шара ұйымдастырды. Барлық өнерпаздар жиылып, ардагерлер тұратын аумаққа барып мерекелік көңіл-күй тарту етті. Соғыс жылдарындағы әндерді шырқап, майдангерлермен көрші тұратын тұрғындарды да жігерлендірді.
Сұрапыл жылдардағы қан майданның зардабы мен қуанышы әсем әуенге бірікті. «День Победы», «Катюша», «Әлия», «Кестелі орамал», «Ана туралы баллада» секілді соғыс даласындағы ерлікті дәріптейтін қазақ және орыс классиктерінің туындылары құлақтың құрышын қандырды. Ж.Шанин атындағы қазақ драма театры мен өзгеде өнер ошақтарының қызметкерлері сүйемелдеп, жанды дауыспен айтқан әндері патриоттық рухты көтерді.
Шымкенттің төменгі Отырар мөлтек ауданында Төрегелді Зорбанов есімді соғыс ардагері тұрады. 95 жастағы қария Мақтаарал ауданының тумасы. 1944 жылы Беларусь майданына барып, фашистпен шайқасқа түскен. Соғыс біткен соң да әскерде қызмет етіп, елге Сталиннің бұйрығымен 1950 жылы оралған.
Қаһарманның көңілі көтерілгенмен, жан жүрегінің түбінде шер жатқаны байқалады. Зіл-батпан қасірет көңілінде қалып қойған. Бірақ, бүгінгі ұрпақ біздерге сол қайғыны сездіртпей, шырқалған әнге билеп жабырқаған көңілін байқатпауға тырысты. Ал, бізде жастық шағында соғысты көрген ардагерге денсаулық тілеп, құрмет көрсетуден басқа шара жоқ. Жеңісті жақындатқан әрбір жауынгерге бас иеміз.
