Мақтаарал ауданында төтенше жағдайдан зардап шеккен тұрғындарға Өзбекстаннан шыққан меценат, миллиардер Әлішер Усмановтың қоры аударған қаражаттан 1000 АҚШ долларынан үлестірілетін болды. Ал, мемлекет әрбірі 100 шаршы метрді құрайтын 1030 үйді жаңадан тұрғызып береді. Бұл туралы Мақтараалдағы төтенше жағдайдың салдарын жоюға құрылған Түркістан облысының шұғыл штабы басшысының орынбасары, «Нұр Отан» Партиясы Түркістан облыстық филиалы төрағасының бірінші орынбасары Бейсен Тәжібаев әлеуметтік желі арқылы хабарлады.
«Сонымен, Мақтаарал ауданындағы тасқын қаупіне ұшырағандарға және үйлерін су басып қалғандарға төмендегідей көмек көрсетілетін болды.
1. Ауылын су басқан 6127 адамға 100 мың теңгеден беріледі. Мұнда қазіргі есеп бойынша 845 отбасы бар. Егер бір отбасыда 5 адам болса 500 мың теңге алады.
2. А. Усмановтың қоры аудан бойынша эвакуацияға ұшыраған тұрғындар үшін 5,2 млн $ аударды. Бұл 2,3 млрд теңге 30 420 адамды құрайтын 5202 отбасының әрқайсына 1000 АҚШ долларынан үлестіріледі.
3. Мемлекет әрбірі 100 шаршы метрді құрайтын 1030 үйді жаңадан тұрғызып береді. Бұдан бөлек орташа бүлінген баспаналарға жөндеу жүргізеді. Ескі үйлері тұрған жер телімдері тұрғындардың өздеріне қалады.
4. Бүгінгі есеп бойынша 7,7 мың гектар алқапта егістік бүлінген. Онда егілген бақшалықтың түрлері мен шығындары есептелуде. Бұл да толық төленеді.
5. Суда қалып өлген мал түгелденуде. Оның да құны нарық бағасына сай өтеледі.
6. Гуманитарлық көмектер толығымен көрсетіледі», — делінген фейсбук парақшада.
