15 мың теңгенің талаптары көп. Мәселен, кез келген адам ала алмайды, жеке шотқа аударылмайды. Сонымен қатар, қолма қол берілмейді. Бұл тек төмендегі арнайы санаттағылар үшін жасалатын көмек. Түркістан облысында қанша отбасы бұл аталмыш көмекті алмақ? Кімге төлемдер жасайды?
- 1, 2, 3 топтағы мүгедектер
- Мүгедек балаларды тәрбиелеп отырған отбасылар
- Көп балалы отбасылар
- Ұлы Отан соғысының мүгедектері мен қатысушылары және оларға теңестірілген адамдар
- Мемлекеттік немесе қоғамдық міндеттерді, әскери қызметті атқару кезінде қаза тапқандардың отбасылары. Ғарыш кеңістігіне ұшуды дайындау немесе жүзеге асыру кезінде, адам өмірін құтқару мен құқық тәртібін қорғау кезінде.
- Ең төменгі және одан аз зейнетақы алатын зейнеткерлер
- Атаулы әлеуметтік көмек алатын азаматтар, соның ішінде жалғыз басты зейнеткерлер.
42500 теңгенің жыры бәрімізге белгілі. Бірі алып, қайта қайтарғандары болды. Ал, ендігі көмектің түрі 15 мың теңгелік коммуналдық төлем. Әлеуметтік төлемнің кателігін қайталамау үшін аталмыш жүйе жеті рет өлшеніп, бір рет кесілген. Енді, алушы азаматтардың жеке сәйкестендірілген нөмері және әлеуметтік дәрежесін көрсететін дербес шоты болуы шарт. Көмек коммуналдық қызметтерді жеткізушілермен өз атынан шарт жасасқан және карантин енгізілген елді мекенде тұратын көрсетілген санаттардағы адамдарға көрсетілетін болады. Мүгедек балаларды тәрбиелеушi отбасылар, көпбалалы отбасылар және қызметiн орындау кезiнде қаза тапқан адамдардың отбасыларына келсек, олардың отбасының бір мүшесінде коммуналдық қызметтерді жеткізушілермен шарт жасалған болуы тиіс. Мұндағы мақсат — төтенше жағдай кезеңінде тұрғындардың қаржылық салмақтарын азайта отырып, коммуналдық қызметтерді жеткізушілердің шығындарын өтеу.
Мемлекеттік көмектің статистикасына көз жүгірсек, Түркістан облысында 42500 теңгені 430 мыңнан астам азамат алып үлгерсе, жеті санатқа кіретіндердің тізімі 385 380 адам. Алдағы кезекте, аудандық әкімдіктер мен коммуналдық мекемелер бірлесе отырып санаттағы тізімдер бойынша азаматтардың атында дербес (абоненттік) шоттарының бар немесе жоқтығын анықтап, анықталған тізім бойынша коммуналдық мекемелердің шотына төлем аударатын болады. Бұған республикалық бюджеттен 7,4 млрд. теңге қаралып отыр. Бұл туралы Түркістан облысының энергетика және тұрғын үй-коммуналдық шаруашылық басқармасы басшысының орынбасары Бақытжан Полатбеков өз сөзінде мәлімдеді.
Осылайша, карантин енгізілген өңірлерде әкімдіктер тұтынушылардың дербес (абоненттік) шоттарына сәуір мен мамыр айларына 15 мың теңгеден төленіп отырады. Өтінім мамыр, маусым айларында қабылданады. Электронды жүйе айдың басында іске қосылады деп күтілуде. Жаңа жүйенің қағидалары мен талаптарын нақтылағыңыз келсе, 109 call орталығынан біле аласыз. Бұдан бөлек, тағы бір көмектің түрі, коммуналдық қызметке берешегі бар азаматтардың тұрғын үйі газ, су, электр жүйесінен уақытша ажыратылмайды.
«Айғақ-Ақпарат»
