Індеттің алдын алу үшін Рамазан айында діни жоралғыларды үйде жасау міндеттелді

Дүниежүзілік денсаулық сақтау ұйымының жаңа COVID-19 коронавирусын пандемия деп жариялауына байланысты, Қазақстан Республикасының Президенті Қ.Тоқаевтың азаматтардың өмірі мен денсаулығын қорғау мақсатында Қазақстан Республикасының заңнамасына сәйкес, ел аумағында енгізілген төтенше жағдайды 2020 жылдың сәуір айының соңына дейін созғандығы белгілі. Ағымдағы жылдың 14 сәуір күні ҚР Президенті жанындағы Орталық коммуникациялар қызметінде тікелей эфирде өткен брифингте Бас мүфти Наурызбай қажы Тағанұлы Рамазан айының алғашқы күні, жамағатпен тарауих намазы, ауызашар беру мәселелері жөнінде діни іс-шараларды өткізу тәртібі туралы баяндады. Осыған байланысты ҚМДБ Түркістан облысы бойынша өкіл имамы Ақтамберді Мұсабек баспасөз брифингін өткізді.
Алла Тағаланың мұсылман құлдарына қасиетті етіп берген бірнеше күндері мен айлары бар. Қасиетті айлардың бірі, әрі бірегейі ол – Рамазан айы. Рамазан айының ерекшелігі сол – мүміндер бұл кезде бір ай бойы ораза ұстайды. Рамазан – мейірімділіктің, қайырымдылықтың, сабырлықтың, кешірімділіктің, тақуалықтың және нәпсіні тәрибиелеу, өз-өзіңе есеп беру айы. Сонымен қатар, Рамазан Құран айы, тақуалық пен тәрбие айы ретінде байыпталады. Бұл тұста Рамазан айындағы тарауих намазын оқуға ниеттенген азаматтар Құран сүрелерін білгенше дұға жасап, оқи беруге болатынын атап өтті. Ал, ауызашар мәселесі бойынша індеттің алдын алу үшін мейлінше, жамағаттың санын арттыруға болмайтынын алға тартты. Ал, айлардың сұлтаны болған Рамазан айында ораза ұстауға ниет еткен азаматтар үшін ораза ұстау сәуір айының 24 күні басталатынын ескертті.