Бердібек Сапарбаев жұмыс сапарымен Шымкентке келді

ҚР Премьер-Министрінің орынбасары Бердібек Сапарбаев бастаған делегация арнайы жұмыс сапарымен Шымкент қаласына келді. Мұнда Бердібек Мəшбекұлы алдымен Ы.Алтынсарин атындағы 65 мектеп-гимназиясында болып, білім мекемесінің тыныс-тіршілігімен танысса, əрмен қарай мектептің акт залында жергілікті ұстаздар қауымымен кездесу өткізіп, білім саласындағы өзекті мəселелер талқыланды. Жиынға ҚР Білім және ғылым министрі Асхат Аймағамбетов, мектеп, колледж, білім беру басқармасының басшылары, білім және ғылым саласын бақылау департаменті, педагогикалық кадрлардың біліктілігін көтеру институтының директорлары қатысты.

Жиында Мемлекет басшысының “Сындарлы қоғамдық диалог – Қазақстанның тұрақтылығы мен өркендеуінің негізі” атты Қазақстан халқына Жолдауын іске асыру аясында білім және ғылым саласының негізгі міндеттері талқыланды.
Мұнда алғаш болып баяндама жасаған Білім және ғылым министрі Асхат Аймағамбетов Жолдауды іске асыру аясында Білім және ғылымның алдында тұрған негізгі міндеттерге кеңінен тоқталды.

Министрдің айтуынша, білім жүйесін жаңғырту жұмыстары барлық бағыттар бойынша жалғасады. Ал, ауқымды тапсырма Жолдауда көтерілген білімді дамыту және тиімді жүйені құруға бағытталады. Осылай деген министр Қазақстанда 2025 жылға дейінгі білім және ғылым саласын дамытуға бағытталып отырған жаңа мемлекеттік бағдарламаның негізгі бағыттарын да жан-жақты түсіндіріп өтті.
Бұл тұрғыда Асхат Аймағамбетов мұғалім мамандығының беделін арттыру өзекті мәселе екенін айтып, оны шешу жолдарын да ұсынды. Сонымен бірге
министрлік мектеп директорларының еңбекақысын көтеру арқылы ынталандыруды көздеп отыр. Осындай мəліметтер айтылған жиын барысында ұстаздар қауымы да өз сауалдарын жолдап ұсыныстарын білдіріп жатты.