Түркістан облысында мақтаның 1 тоннасын 150 мың теңгеден қабылдауды бастады

Түркістан облысы бойынша биыл 131 мың гектарға мақта дақылы егіліп, орташа 26,2 центнерден, 343 мың тоннадан астам шитті мақта жинау жоспарлануда. Ауыл шаруашылығы дақылдарын әртараптандыруға сәйкес биыл мақта егісінің көлемі өткен жылдан 1,5 мың гектарға кем егілген.
Бүгінде Түркістан облысы бойынша мақта жинау науқаны басталып, оған 339 комбаин жұмылдырылып, шитті мақтаның 62% комбайнмен жинау жоспарланып отыр. Бүгінгі таңда жалпы мөлшері 25,8 мың тонна шитті мақта жиналып үлгерсе, бұл көрсеткіш меженің сегіз пайызын құрайды.
Атап айтқанда: Жетісай 12,8 мың тонна, Мақтаарал 9,4 мың тонна, Шардара аудандары 2,6 мың тонна ақ алтын жинап үлгерген.

Бүгінгі таңға мақтаны өңдеумен айналысатын облыстағы 16 зауыттың 7-еуі шитті мақтаның 1 тоннасын 150 мың теңгеден қабылдауды бастады.
Ал қалған 9 зауыттың шитті мақта қабылдауға біліктілік талаптары қаралуда.
Қазіргі таңға жиналған шитті мақтаны алғашқы өңдеуден өткізетін 16 лицензияланған мақта өңдеу кәсіпорындарының 184 мақта қабылдау бекеттері жұмыс істеуде.
Одан бөлек 1 тонна шитті мақта өнімінің әр тоннасына 12 мың теңге субсидия төленетін болады. Бұл бағытқа 1,9 млрд.теңге қаржы қаралған.
Дəл қазір диқан қауымы қабылдау бекеттеріне мақтаның əр тоннасын 150 мың теңгеден өткізуде.
Бұл ретте өткізу фактісі субсидиялаудың ақпараттық жүйесінің электрондық шот-фактуралардың ақпараттық жүйесімен ақпараттық өзара іс-қимылы нәтижесінде расталуы тиіс;
Субсидия алу үшін электрондық шот-фактураларды кері қайтарып алуға, жоюға және түзетуге жол берілмейді.
Қажетті құжаттар:
— қайта өңдеу кәсіпорнымен жасалған ауыл шаруашылығы өнімін тапсыру туралы шарттардың;
— қайта өңдеу кәсіпорны мен ауыл шаруашылығы тауар өндіруші немесе ауыл шаруашылығы кооперативі арасында өнім беруді растайтын құжаттардың және қайта өңдеу кәсіпорны шеккен шығындарды растайтын төлем құжаттарының болуына қатысты мәліметтерді көрсетеді. Мақта жинау науқанына қатысты осы жəне өзге де мəліметтер барысын Түркістан облыстық ауыл шаруашылығы басқармасының басшысы Нұрбек Бадырақов баспасөз жиынында мəлім етті.