Бұған дейін Шығыс Қазақстан облысы аумағында болып көші-қон бойынша атқарылып жатқан жұмыстармен танысқан Түркістан облыстық насихат топ сапары бүгін Павлодар облысында жалғасуда. Аталмыш аймаққа тек соңғы үш жылдың өзінде еліміздің Оңтүстік өңірлерінен 288 отбасы (1349 адам) қоныс аударып келген. Айталық облыс орталығы Павлодар қаласынан 50 шақырымдық қашықтықта жатқан Григорьский ауылдық округіне қарасты Жана қала ауылына биыл отбасымен көшіп келгендердің бірі Гүлжан Құмашева.
Бұған дейін Түркістан облысына қарасты Жетісай ауданында тұрған көп балалы ана Жаңа қала елді мекеніне осыдан 4 ай бұрын келіп өз мамандығы бойынша тұрақты жұмысқа да орналасып үлгерген.
Яғни жергілікті жердегі 700-ден астам тұрғынға медициналық қызмет көрсететін ФАП-де медбике болып еңбек етіп жатқан Гүлжан Құмашева көші-қон бағдарламасы аясындағы мемлекеттік қолдау шараларының нəтижесінде қазір баспаналы болып отыр. Бүгінде ұл- қыздарын мектеп пен балабақшаларға орналастырып мамандығына сай жұмыс жасап жатқан ана Павлодар облысына көшіп келуге ниет білдірген жерлестерін осында келіп еңбек етуге шақырады.
Аймақтағы ауыл шаруашылығына бейім Набережное ауылындағы ФАП-қа да биыл Түркістан облысынан келген жас маман Аида Рысқұл медбике болып жұмысқа орналасқан. Отырар ауданының тумасы Шымкент қаласындағы медициналық колледжді тəмамдап еңбек жолын Павлодар облысынан бастағанды жөн көрген.
