Шырайлы Шығыс шақырады

«Nur Otan» партиясы Түркістан облыстық филиалы жанынан құрылған топ Оңтүстіктен Солтүстікке атты көші-қон бағдарламасын насихаттау мақсатында Шығыс Қазақстан мен Павлодар облыстарына іс- сапармен жолға шықты. Аталмыш топ құрамында бірқатар аймақтық БАҚ өкілдері мен Түркістан облыстық Қазақстан халқы ассамблеясы төрағасының орынбасары-хатшылық меңгерушісі Ғани Рысбеков, облыстық мəслихат депутаты Жаңабай Ағабеков Түркістан облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Тұрар Керімұлы жəне Сайрам ауданы əкімінің орынбасары Мадияр Оразалиевтер де бар.

Түркістан облысының халқы тығыз аудандарынан Республикамыздың солтүстік өңірлеріне халықтың қоныс аударуы туралы ҚР Тұңғыш Президенті, Елбасы Н.Ә.Назарбаевтың «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауының үшінші кешенді міндетінде – еңбек нарығын жаңғыртуда басы артық жұмыс күші бар өңірлерден басқа жерлерге жұмыс күшін ұтымдылықпен тартуға қолдау көрсетуге басымдық берілген. Осы міндетті орындау үшін облысымызда ішкі көші-қон процесстерін реттеу және еңбек күші мол аймақтан, еңбек күші жетіспейтін Республикамыздың солтүстік жəне шығыс өңірлеріне өз еркімен халықты қоныстандыру жұмыстары қарқынды жүргізілуде.

Аталған жұмыстар облысымызда 2015 жылдан бері жүзеге асырылуда. Сонымен бірге халықты қоныс аударуға ынталандыру мақсатында облысымызда бірқатар жұмыстар атқарылып келеді. Мəселен ол үшін Республикамыздың солтүстік, шығыс өңірлеріндегі бос жұмыс орындары туралы мәлімет ай сайын алынып, аудандық, қалалық жұмыспен қамту орталықтарының базалық мәліметтеріне енгізіліп тұрады. Орталықтар өз тарапынан қоныс аударуға ниетті азаматтарға бос жұмыс орындарын ұсынады. 2018 жылдың өзінде осы өңірлерден 3 мыңға жуық жұмыс орындары ұсынылған.

Сондай-ақ, қоныс аудару процессін жылдамдату, туындаған мәселелерді жедел шешу, көшуге ниет білдіргендерге жағдай жасау үшін, Солтүстік өңірлердің өкілдері кезең-кезеңмен облысымызда болып түсіндіру жұмыстары жүргізілді. Осы орайда Түркістан облысынан жолға шыққан арнайы топ алдымен Өскемен қаласына аялдады. Мұнда өңір делегациясын Шығыс Қазақстан облысы əкімдігінің өкілдері қарсы алса көші-қон ұйымдастыру шараларына қарсы алғашқы жиын Өскемен қалалық əкімдігі ғимаратында өтті. Оған ШҚО-на қарасты аудан ауылдық округ əкімдері мен осы аймақтарға Оңтүстік өңірлерден қоныс аударып келген азаматтар да қатысты.

Ал келелі басқосуда алғаш болып сөз алған ШҚО жұмыспен қамтуды үйлестіру жəне əлеуметтік бағдарламалар басқармасы басшысының орынбасары Тимур Жігітаев тек биылғы жылдың өзінде аймаққа 200 ден астам азаматтың Түркістан облысына қарасты аудандардан қоныс аударып келгендігін жеткізді.

Сонымен бірге жиын барысында ШҚО-на қарасты бірқатар аудандардың мүмкіндіктері жан-жақты таныстырылып қоныс аударып келушілерге ұсынылатын қолдаулары бойынша да мағлұматтар берілді. ШҚО-ның Ұлан ауданына Сарыағаш ауданы Еңкес ауылынан көшіп келіп өз кəсібін дөңгелетіп отырған азаматтың бірі Əбілқасым Дүйсебаев. Алтай ауданынан 110 гектардан астам жер алып 50 гектар картоп өсіруді қолға алған диқан ШҚО табиғаты шаруашылыққа өте қолайлы екендігін айтады.

Абай Омаров,

Шығыс Қазақстан облысынан.