Түркістан облысы бойынша 2019 жылы автомобиль жолдары саласында құрылыс-жөндеу жұмыстарымен 607 нысан (11 көпір) немесе 1737,6 шақырым жолдар мен елді мекен көшелері қамтылып отыр. Оның ішінде 585 нысан немесе 1339,5 шақырым жолды биыл жыл соңына дейін пайдалануға тапсыру жоспарланған.
Облыстық маңызы бар автомобиль жолдарын жөндеуде негізігі басымдық — облыс орталығы мен аудан орталықтарын қосатын жолдар мен республикалық маңызы бар автомобиль жолдарына шығатын жолдарға беріліп отыр. Оған қоса, қазіргі таңда халық тығыз орналасқан аудандарды облыс орталығына қосатын жолдарды жөндеуге де көңіл бөлінуде.
Биылғы жылы Түркістан облысының жолаушылар көлігі және автомобиль жолдары басқармасы тапсырысшы болып табылатын 49 нысанда (оның ішінде өтпелі-21 нысан, жаңа-28 нысан) қайта құру, күрделі және орташа жөндеу жұмыстары іске асырылуда.
Атап айтсақ: 3 автомобиль жолын қайта құру, 14 автомобиль жолын күрделі жөндеу, 27 автомобиль жолын орташа жөндеу, 5 көпір күрделі жөндеуден өтіп жатыр.
Жалпы 49 нысанның 15 нысаны келесі жылдарға өтпелі болса, 34 нысанның жөндеу жұмыстары биылғы жылы аяқталып, пайдалануға берілуі тиіс.
Жол саласындағы жүзеге асып жатқан үлкен жобаның бірі Шымкент — Сайрам -Қарамұрт бағытындағы жолды қайта құрылымдаудан өткізу болып табылады. Яғни тозығы жеткен екі жолақты ескі жолдың 8 шақырымын жөндеуден өткізіп 4 жолақты етіп кеңейту жұмыстары 2017 жылы басталған. Бүгінде қарқынды жұмыстар атқарылып жатқан бұл нысан бойында пойызжол өткеліне арналған көпір де қайта салынып жатыр.
2018 жылдың қорытындысы бойынша жақсы және қанағаттанарлық жағдайдағы облыстық және аудандық маңызы бар автомобиль жолдарының үлесі 72,1%-ды құраса, 2019 жылдың қорытындысымен бұл көрсеткішті 74,1%-ға жеткізу жоспарланып отыр. Ең бастысы жол құрылыстарының сапасы да жіті бақылауда. Бұл туралы Түркістан облыстық жолаушылар көлігі жəне автомобиль жолдары басқармасының басшысы Ролан Ибрагимов мəлімдеді.
