Шымкент қаласы тағы бір маңызды нысанмен толықты. «Белсенді өмір сүру ұзақтығы» деп аталатын ғимаратта егде жастағы қариялар мен балалар үйіндегі бүлдіршіндер өз уақытын тиімді өткізе алады. Себебі, жаңа орталықта интернет-кафе, емдік бөлмелер, кинозал, кітапхана, тіпті тренажерлық залдар да бар. Үш қабаттан тұратын ғимараттың ашылу салтанатына мегаполис мэрі Ғабидолла Әбдірахымов арнайы қатысты.
Қарты бар үйдің қазынасы бар. Қашан да үлкенді құрметтеп, кішіні ізеттеп жүретін халықпыз. Оларға қолайлы жағдай жасау — бізге парыз. Сондықтан да «Белсенді өмір сүру ұзақтығы» ғимараты бой көтерді. Үш қабаттан тұратын орталық интернет-кафе, емдік бөлмелері, кинозал, кітапхана және тренажерлық залдармен қамтылған. Салтанатты ашылу рәсіміне арнайы келген Ғабидолла Әбдірахымов заманауи құралдармен жабдықталған аулада орталыққа келген қала тұрғындарымен және бүлдіршіндермен жүздесті.
Аталмыш орталық 70-ке жуық қарттар үшін арнаулы әлеуметтік және медициналық қызметтер көрсететін болады. Бұдан өзге, балаларға арналған ойын-сауық бөлмелері де бар. Бұл жоба орталыққа келетін қариялардың өмірлік тәжірибесін үлгі-өнеге ретінде ата-анасының қамқорлығынсыз қалған балалардың бойына сіңіре отырып, тіл табыссын деген ниетпен іске асып отыр. Естеріңізде болса, Елбасы Н.Назарбаев қарттар мен балалар үйлерін біріктіру мәселелерін тапсырған болатын.
Орталық өз жұмысын бастағанына бір күн болса да, бүлдіршіндер мен қариялар тез тіл табысып кетті. Канада елінде іске асқан бұл жобаның да негізгі мақсаты осы. Егде жастағы қарттар мен ата-анасының қамқорлығынсыз қалған балапандардың жаралы жүректеріне, қуаныш сыйласақ, одан асқан бақыт жоқ.
