Қазақстанда FlyArystan әуекомпаниясы жұмысын бастады. Бұдан былай 180 орынды әуе кемесі қанатын жайып, Шымкент пен Алматы бағыты бойынша ұшатын болады. Бағасы қолжетімді. 4999 теңгеден басталып көтеріле береді.
Шымкент әуежайында қала әкімі Ғабидолла Әбдірахымов «Эйр Астана» авиакомпаниясының президенті Питер Фостерді күтіп алып, еліміздегі бірінші бюджеттік авиакомпанияның жұмысына сәттілік тіледі.
— Еліміздің үшінші мегаполисіне арнайы келген Питер Фостер мырзаға зор алғысымды білдіремін. Және шын жүректен алғашқы рейстің сәтті қонуларымен құттықтаймын. Бұл қала тұрғындары мен қонақтарына үлкен мүмкіндік береді деген ойдамыз. Өйткені біздің қаламыз арқылы көршілес облыс пен Өзбекстан Республикасының азаматтары ұшады. Билет жетіспеушілігі сезілетін. Ендігі арзан бағамен оңтүстік астанаға ұша алады. Әуекомпанияның алдағы жұмыстарына сәттілік тілеймін, — деді қала басшысы.
Алматыдан Шымкентке қатынаған бірінші рейс лық толып, оның біраз билеті ең минималды тарифпен, яғни 10 000 теңгеге дейінгі бағамен сатылған. Қазіргі уақытта саяхаттарын 26 қазанға дейін жоспарлап отырған жолаушылар әуекомпанияның ресми сайтынан билеттерді белсенді түрде брондап жатқанын байқауға болады.
«Шымкент – еліміздің республикалық маңызға ие мегаполистеріне айналған ірі қалалардың бірі. Сол себепті FlyArystan-ның келуінен кейін жергілікті халық қажеттіліктеріне сай алтын уақыттарын үнемдеп, лоукостермен сапар шегуді таңдайды деген сенімдемін», — деп атап өтті Шымкентте журналистермен өткен кездесуде Эйр Астана компаниясының президенті Питер Фостер мырза.
Естеріңізге сала кетсек, оңтүстік астанадан шырайлы Шымкентке орындалатын рейстердің ең төменгі билет құны 4999 теңгеден басталса, сапардың ұшу ұзақтығы 1 сағат 20 минут болмақ. FlyArystan барша жолаушыларға әуекомпанияның сайты flyarystan.com-да жарияланған тариф ережелерімен мұқият таныс болуды сұрайды.
