АҚШ-та Иордания ханзадасы қазақтың тұсаукесер рәсімін орындады

АҚШ-та Иордания ханзадасы қазақтың дәстүрі бойынша бүлдіршіннің тұсаукесер рәсімін орындады. Қалай дейсіз ғой?! Америкада білім алып жатқан қазақстандық жастар, ерлі-зайыпты Әсет пен Жансая 1-ге толған қыздарының тұсаукесер дәстүрін Иорданияның ханзадасы, профессор Зейд Раад Әл Хусейнге сеніп тапсырады.

Өйткені, Қазақстан Гуманитарлық ғылымдар академиясының, сондай-ақ Педагогикалық ғылымдар академиясының академигі, халықаралық психологиялық ғылымдар академиясының академигі, педагогика ғылымдарының докторы, профессор Асма Қалыбекованың «Қазақ халық тәрбиесінің асыл мұрасы» атты ағылшын тілінде жарық көрген еңбегімен жіті танысқан Иордания ханзадасы қазақ халқының салт-дәстүрлеріне тәнті болған. Шымкенттік академиктің кітабына жоғары баға беріп, жанынан тастамаған. Зейд Раад Әл Хусейн  2014 жылдың 1 қыркүйегінен Біріккен Ұлттар Ұйымының Адам құқықтары жөніндегі Жоғарғы комиссары.

Академик, профессор Асма Қалыбекованың айтуынша, дәл осы еңбектің жазылуының өзіндік тарихы бар. Павлодарда туылып, Ресейде білім алған Асма Ахметқызы оңтүстіктің келіні атанады. Алғашында ана тілімізде сөйлей алмағандығына қынжылып, қазақ тіліндегі романдарды оқи бастайды. Сол арқылы ұлтымыздың дәстүрлерімен терең танысып, жарты ғасырға жуық жинаған мұрағаттық суреттерден кітап жазып, тәрбие жүйесін жаңарту әдістемесіне баса көңіл бөлген. Қазақ, орыс тілдерінде жазылған  «Қазақ халық тәрбиесінің асыл мұрасы» атты кітап Сыртқы істер министрлігінің қолдауымен көп ұзамай ағылшын тіліне аударылады. Еліміздің шетелдердегі бірқатар Төтенше және өкілетті Елшіліктеріне арнайы қойылған. АҚШ-та да Елшілік арқылы еңбекті алдыртқан жас отбасы-магистранттар Иордания принціне қазақ елі, салт-дәстүріміз туралы кеңінен таныстырып берді.  Осы тұста, Біріккен Ұлттар Ұйымының Адам құқықтары жөніндегі Жоғарғы комиссары, профессор Зейд Раад Әл Хусейн Қазақстанға келетін жағдай орын алса, міндетті түрде кітаптың авторы Асма Қалыбековамен кездесемін деп отыр.

«Айғақ-ақпарат»