Ділдәбек Оразбаев Аягөз ауданының әкімі болып тағайындалды

«А» корпусының әкімшілік мемлекеттік қызметшісін ротациялау туралы Шығыс Қазақстан облысының әкімі Д.Ахметовтің өкіміне сәйкес, бұған дейін Тарбағатай ауданының әкімі қызметін атқарып келген Ділдәбек Оразбаев штаттық кестеге сәйкес жалақымен ротация жүргізу тәртібінде Шығыс Қазақстан облысы Аягөз ауданының әкімі болып тағайындалды.

Оразбаев Ділдәбек Тәжібайұлы 1961 жылы 8 мамырда Оңтүстік Қазақстан облысы, Төлеби ауданы, Қасқасу ауылында дүниеге келген. 1988 жылы Қазақтың Еңбек Қызыл Ту орденді ауыл шаруашылығы институтын ғалым агроном және 2009 жылы Алматы экономикалық университетін қаржыгер мамандықтары бойынша бітірген.

Еңбек жолын Оңтүстік Қазақстан облысы Ленгер ауданының Абай атындағы ұжымшарында (колхозында) механизатор болып бастады. Әртүрлі жылдарда аталған ұжымшарда бас экономист, ұжымшар бригадирі, бас агроном, ұжымшар төрағасы, Оңтүстік Қазақстан облысы Төлеби ауданы бойынша салық бөлімінде аға салық инспекторы, «Ағжан-Мағжан» ЖШС директоры, Оңтүстік Қазақстан облысы табиғи ресурстар және табиғат пайдалануды реттеу басқармасының бастығы, басқарма бастығының орынбасары, департамент директорының орынбасары, басқарма бастығының міндетін атқарушы, Қазақстан Республикасы Ауыл шаруашылығы министрлігі Су ресурстары комитетінің «Шығыссушар» республикалық мемлекеттік кәсіпорнының директоры қызметтерін атқарды. Тарбағатай ауданының әкімі қызметіне тағайындалғанға дейін Қазақстан Республикасы Ауыл шаруашылығы министрлігі Су ресурстары комитетінің «Қазсушар» республикалық мемлекеттік кәсіпорны Шығыс Қазақстан филиалының директоры, Шығыс Қазақстан облысы мәслихатының депутаты болып қызмет етті.

2013 жылдың 28 маусымынан бастап Шығыс Қазақстан облысы Тарбағатай ауданының әкімі болып еңбек етті. 6 жылдан бері Қазақстанның қиыр шығысының нүктесі болып табылатын Тарбағатайды басқарған ол оңтүстіктен отбасылардың қоныстануына жағдай жасады. Жер телімдерін бөліп, шаруашылықты дамытуға мұрындық болды. Қазіргі таңда мұнда бау-бақша, егін шаруашылығы дамып келеді. Шардаралық қоныстанушылар қарбыз егіп, жазда лайықты өнім алғандығын жергілікті жұрт мақтанышпен айтып жүрді.

Ділдәбек Тәжібайұлының іскерлігінің дәлелі — Елбасының «Болашаққа бағдар: рухани жаңғыру» бағдарламалық мақаласын жүзеге асыруда көптеген рухани орындардың қайта жаңғырғандығы.