Шегірткемен күрестің көлемі азайса да, қаражаттың мөлшері азаймаған

Қара жерден несібесін тауып отырған диқандар үшін, биыл шегірткеден келетін қауіп мүлдем болмайды. Агроөнеркәсіп кешеніндегі мемлекеттік инспекция осылай деп сендірді. Жауапты комитет өкілдерінің айтуынша, зиянкес жәндіктің қатары республика бойынша 2 есеге азайған. Мысалы, өткен жылы елімізде 1 млн. 724 мың гектар жер тазартылса, биылғы жоспар 950 мың гектарды құрап отыр. Бірақ, бір қызығы былтыр дәл осы жұмыстарға қазынадан 2,5 млрд. теңге бөлінсе,  ал аталған кезеңде өңделетін жердің көлемі екі есеге азайса да жұмсалатын қаражаттың мөлшері 400 млн. теңгеге ғана кеміген.

Шегірткенің шабуылына шама келмей, диқандардың сан соғып қалған кезеңі бұл. 2017- 2018 жылдың көктемі мен жаз айларында жазық даладағы егістігінен, көкмайса көкөнісінен айырылғандардың қаншама еңбегі құрдымға кетіп еді. Жолындағы барды жоққа айналдырып, шегірткенің сайран салғаны есімізде. Алайда, биыл дернәсілге қарсы күресетін мамандар олқылықтың орын алмайтынын айтып, жасағын түгендеп отыр. Ол үшін облысқа  51 мың гектар жерді өңдеуге жететін арнайы препараттар жеткізіліп,  43 техника әзірленіпті. Агроөнеркәсіп кешеніндегі мемлекеттік инспекция комитеті биыл диқандарға аталған жәндіктен ешқандай залал келмейтіндігін мәлімдеді. 

Респуликалық қазынадан өсімдік қорғау және карантин бағытына 34 млрд. теңге бөлініпті. Қыруар қаржының 2,1 млрд.-ы шегірткемен күресуге бағытталмақ. Ал млрд.-тардың 74 млн.-ы Түркістан облысындағы шараларға жұмсалады. Бір қызығы, 2018 жылы 1 млн. 724 мың гектар жерді  химиялық тазалау үшін 2,5 млрд. теңге қажет болған. Ал биыл жер көлемі 950 мың гектарды құрап отыр. Яғни өңделетін аумақ екі есеге азайған. Бірақ қаржының мөлшері 2,5 млрд.тан 2,1 млрд.қа, яғни 400 млн. теңгеге ғана кеміп отыр.

Қалай десекте, кезеңі жеткенде зиянкес жәндіктің зияны тимесе игі. Ол үшін марокко шегірткесінің ошағын оқшаулау шаралары дер кезінде атқарылуы тиіс. Мамандар химиялық тазалау жұмыстары Шардара, Арыс, Сарыағаш, Келес аудандарындағы аумақтарда сәуір айының орта тұсында басталатынын айтады.

Шегірткемен күресу үшін арнайы штаб та құрылған. Алғашқы отырысында аудандарға алдағы жоспарлар мен тапсырмалар да нақтыланды. Демек, комитеттен келгендердің сөзіне сенсек, диқандардың  алаңдауына биыл ешбір негіз жоқ.

Айғақ-ақпарат