Түркістанда депутаттар салықтан жалтарғандарды талқылады

Сәтті күн сәрсенбіде Түркістан облысы мәслиxатының депутаттары жиылды. Бюджет және экономиканың дамуы жөніндегі тұрақты комиссияның құрамындағы xалық қалаулылары үш мәселені талқылады. Мәселе талқылауға кіріспестен бұрын жуырда Түркістан облысы әкімінің орынбасары болып тағайындалған Жолдымұрат Аманбаевты таныстырды. Мұнан кейін барып мәселе талқылауға кірісті. Соның алғашқысы Түркістан облысы бюджетінің кіріс бөлігін толықтыру бойынша қаралды. Өңірлік мемлекеттік кірістер департаментінің мемлекеттік қызмет көрсетулер басқармасының басшысы Әлібек Тілегенов баяндама жасап, салық көзін жалтарып жүрген кәсіпкерлерден бастады. Заң аясында жұмыс істемейтіндер туралы тарқатты. Барлық кәсіпкерлерді тиісті салық төлеуге шақырып отыр. Аудан, қала әкімдеріне бизнесмендермен меморандум түзу керек дейді. Қоршаған ортаға тигізген зиянына байланысты тойxана, мейрамхана, дәмxана және дүкендер төлемақы төлеуден жалтаруда. Осы мәселенің әзірге бір шеті әшкереленді. Түркістан облысындағы кірістер туралы баяндама аяқталғанда депутаттар сан түрлі сұрақ көтерді. Мәселен, xалықтың қалаулы азаматтары тойxанаға келіп, ән айтып миллиондарды қалтаға салып кететін әншілер салық төлеу керек деп отыр. Бұған бәрі қосыла кетті. Расында фонограммамен ән айтатын әншілер неге салық төлемеске?

Тұрақты комиссияның отырысында салық төлемейтін түрлі мекемелер белгілі болды. Көпшілігі — кәсіпкерлер. Осылардың барлығы мемлекеттің қазынасына құйылатын қаражатты жалтарып жүргендер. Екінші қаралған мәселе жергілікті мемлекеттік-жекешелік әріптестік жобаларды іске асыру. Талқыланған үшінші мәселе Түркістан облысының бюджетіне өзгерістер мен толықтырулар енгізу.  Қос бірдей тақырыпты Түркістан облысындағы экономика және бюджеттік жоспарлау басқармасы басшысының міндетін уақытша атқарушы Тастанов толықтырып тарқатты. Көтерілген мәселенің барлығы алдағы уақытта өтетін сессия отырысына жіберілді. Депутаттардың қайта талқысына түседі.