Шымкенттегі құрылыс жұмыстарымен танысқан Президент «Азала текстиль» жауапкершілігі шектеулі серіктестігінде аялдады. Қасым-Жомарт Тоқаевқа өңірдегі индустриялық даму бағдарламасының, «Оңтүстік» арнайы экономикалық аймағындағы инвестициялық бағдарламаның жүзеге асырылу барысы мен жеңіл өнеркәсіп нысандары қызметінің негізгі көрсеткіштері туралы баяндалды. 
Алғашқы сапарын Түркістан мен Шымкенттен бастаған Мемлекет басшысы фабрика жұмысымен және онда шығарылатын негізгі өнім түрлерімен танысты. Өз өндірісін дамытып, импорттық тауарлар орнын алмастыру – Қазақстанның экономикалық саясатының маңызды міндетінің бірі екеніне назар аударды. 
Айта кететін жайт, «Азала текстиль» жобасы үдемелі индустриялық-инновациялық даму бағдарламасы аясында жүзеге асырылуда. Фабрика бүгінде мақтадан түрлі өнімдер дайындап, республикамыздан бөлек шетелге де экспорттауды қолға алған. Тоқыма фабрикасы облысымыздағы ең үлкен өндіріс ошақтарының бірі екендігі мәлім. Ел экономикасының дамуына үлес қосып келе жатқан кәсіпорын жергілікті 600-ден астам адамды жұмыспен қамтып отыр.
