Ғасыр жасаған ұстаз

Қарт ұстаз 100 – ге толды. Мереке қарсаңында Кеңес Одағының Батыры Сабыр Рахымов атындағы Шымкент республикалық «Жас ұлан» мектебі мен қалалық «Жастар ресурстық орталығының» бірлесуімен ғасыр жасаған Шырынгүл әжені шаңырағына құттықтап барды. Ақ жаулықты ана келген қонақтарға алғысын айтып, ақ батасын берді.

Бір ғасырдың куәсі болған Шырынгүл әже 1919 жылы Қаратау етегінде Амалбек болыстың шаңырағында дүниеге келген. Көп жасаған, өмірдің талай соқпағын басынан өткерген ардақты әже 40 жасында жарынан жесір қалған. Тоғыз құрсақ көтерген аяулы ана тағдырдың басқа салған қиындығына мойымай ұл – қыздарын қанаттыға қақтырмай, тұмсықтыға шоқтырмай өсірді. Балаларының Жоғары оқу орнына түсуіне жағдай жасаған батыр ананың  перзенттері бүгінде  әр саланың білікті маманына айналған.

Отбасын, ошақ қасын дөңгелете жүріп, алғашқы колхоз құрылысы кезінде ауыл мұғалімі қызметін атқарды. Қарт ұстаз шәкірттерін білім нәрімен сусындатып, өнегелі өмірін шәкірт тәрбиелеуге арнаған. Қазіргі таңда Қозмолдақ ауылының үлкені,  майдангердің жары, тыл ардагері.

Ғасырға иек артып отырған әжеміздің еңбек жолы да, өнегелі өмірі де бүгінгі ұрпаққа үлгі. Отбасының ұйытқысы болып отырған ардақты әжеміздің 25 немересі, 25 шөбересі мен 1 шөпшегі бар бақытты ана.

«Айғақ-ақпарат».