Әкім болған Түймебаев қандай ісімен ел есінде?

Әкімнің креслосын босатқан Жансейіт Қансейітұлы ел есінде несімен қалды? Оңтүстіктің соңғы ал, Түркістан облысының тұңғыш әкімі болған Түймебаевтың есімі тарихта жазылары сөзсіз. Себебі, Қазақстанда су жаңа облыс құрылғанда басы-қасында болған  дәл осы азамат. Бәйдібек ауданына қарасты Қайнар ауылынан қайнап шыққан қайраткер күнгей аймағына не өзгеріс алып келді? Түймебаев дәуреніне кері шегініс жасап көрейік. 

2016 жылдың 7-қазаны. Дәл осы дата Жансейіт Түймебаев үшін ерекше сәт. Өйткені, жеті жылға жуық Елшілікте жүріп дипломатиялық қабілетін көрсеткен азамат туған жеріне абыроймен келді. Негізі лауазымды шенеуніктер елден жыраққа Елші болып кеткенде тағдырлары әрқилы болып өзгереді. Кейбіреулері сол бойы биліктің сахнасынан орнын жоғалтса, енді біреулерінің қызметтері жоғарылайды. Ресей, Түркия, Албания Республикаларында дипломат болған Түймебаев орны айрықша Оңтүстікке әкім болғанда жұрт елең етті. Филология, заңгер мамандығын игерген азаматтан қайырлы жаңалық күтті. Тіл байлығы зор, сөзіне сендіре алатын Жансейіт Қансейітұлы креслоға отырған күннен бастап елді мекендердің тынысын назарға ілді. Шетелдің өмірін көріп, тәжирибе жинаған басшы бірден мәдениетті көтеру керек деп айтты. Туристерді шошытпай, әжетханаларды реттеу керектігін тапсырған болатын. Жауапкершілікті сезінетін аудан, қала әкімдері әжетханаларды қолға алып, жаңартты.

«Шатқал» десек барлығымыздың есімізге Түймебаев сарт етіп оралады. Қоршаған орта табиғатты аялау керектігін қатаң қадағалаған азамат Шымкент қаласында шатқалдарды салып, жасыл желек егілген болатын. Саябақтарға отырғызылған сол көшеттердің біразы көгерсе, кейбір ағаштар қараусыз қалғаны жасырын емес.

Дәл осы еккен талдардың орын жасыл баққа айналуын армандаған Түймебаев бір топ қызметкерлерді туысқан Түркия жеріне тәжірибе алмасып қайтуын да ұйымдастырды. Дегенмен, облыс орталығы Түркістанға ауысып бұл идеян соңына жетпей кетті. Иә, айтпақшы әлеуметтік салаға жіті мән берген Жансейіт Қансейітұлы дәрігерлер мен ұстаздардың біліктілігін шыңдап тәжірибе алмассын деген мақсатпен сол Түркияға талай топты жіберді. Қара теңіз жағалауындағы тамаша мекенге барғандардың қатарында журналистер де бар. Бұл сапара әріптестердің естерінен шықпаған болар.

Бір кездері білім саласының көсегесін көгерткен министр Оңтүстік өлкесінде әкім болғанда ұстаздарына алғыс айтқан бірден-бір басшы. Қаратаудың етегінде дүниеге келген Түймебаев орта білімді Шымкент қаласында алған. Қазіргі Маржан Тасова атындағы үш тілде оқытатын №12 мамандандырылған мектеп-интернаты Түймебаевтың түлеп ұшқан алтын ұясы. Әкім болған сәтінде ұлағатты ұстазарына құрмет көрсеткен мемлекеттік қызметкер шәкірттік міндетті бәріміздің есімізге тағы бір салған болатын. Халық үшін игілікті тірлік атқаруға барын салған бұл азаматтың тұсында талай шаңырақ шаттықа кенелгені естеріңізде ме? Әлеуметтік жағдайы төмен отбасыларға баспананың кілтін табыстау үшін тірлікті тездетіп, көп қабатты үйлердің құрылысын соңына жеткіздірді. Елмен елді елдестіруде тәжірибесі мол Жансейіт мырзаның әкім болған уақытында инвесторларды жиі тартқан болатын. Әсіресе, Түркия Республикасынан кәсіпкерлер келіп, бірлесіп жұмыс жасау мақсатында қаншама мемарандум түзілді. Оңтүстік Қазақстан облысының соңғы әкімі болған азамат ауыз толтырып айтарлықтай іс атқарғаны әлі күнге дейін жұртшылықтың есінде болар…

Түймебаевтың тұсында қол қойылған тарихи оқиғалардың ең маңыздысына тоқталсақ. Қордаланып қалған Мақтарал мен Сарыағаш аудандары дәл осы еңбекқор әкімнің кезінде екіге бөлінген болатын. Ал, Оңтүстік Қазақстан облысының орталығын Түркістан қаласына көшіру Түймебаевтың өмірбаянына алтын әріппен жазылып қалар оқиға. Шымкент қаласының миллионға жетуі дәл осы қайраткердің тұсындағы жаңалық.

Мемлекеттік қызметте айы оңынан туып, 2018 жылдың 19 маусымынан бастап Түркістан облысына әкім болды.  Қасиет қонған құт мекеннің билігін Жансейіт Қансейітұлының тұңғыш тізгіндеуі тектен-тек емес сірә.  Қазақ хандығының резиденциясы болған рухани орталық бойында имандылығы, ілімі бар қайраткерді жетелеген болар. Қалай десекте, Түркістан облысында Түймебаевтың ізі бар.  Атақты хандар, билер, батырлардың сүйегі жерленген киелі өңірдің екі тізгін, бір шылбырын қолға алған азамат осылайша Түркістанды өзге қырынан көрсете бастаған болатын. Жаңа әкімшілік әскерлік орталығының капсуласына алғаш қолы тиген тұлға.  Сабырлы, салмақты мінезі бар байырғы әкім түрлі фестивальді ұйымдастырып, халықтың назарын аударды. Мәселен, Түлкібаста «Ақсу Жабағылы алауы, шұбайқызыл жалауы» атты фестиваль, Бәйдібек ауданында «Қымызмұрындық», Жетісай ауданында «Қауынфест», туризм саласын дамыту бағытында «Сафари-Шардара», Төлеби ауданында «Тау самалы, жан самалы» атты фестивальдер Түймебаевтың тұсындағы жаңалық. Мәдениет қайраткерлеріне көп мән берген, жастарға жиі көңіл бөлген Жансейт Қансейітұлы қызметтен кетер уақытында Түркістан облысында жастар орталығының ғимаратын пайдалануға беріп, ел есінде тағы бір қырымен сақталды.

Мінекей, бұл айтылғандар ертеңге аңыз болар саясат саңлағының ғұмырнамасы. Ой-өрісі кең, түкті жүректі, алғыр азаматтың еліне бергенінен, әлі берері көп. Сондықтан Түймебаевқа сәттілік тілеп, биік белестен көрінуіне «Айғақ» ұжымы әркез тілекші.

«Айғақ-ақпарат».