Қаламыздың ірі сауда орындары, оның ішінде жоғары топқа жататындарының бірқатары кіші кәсіпкерлік немесе микрокәсіпкерлік субъектілеріне жатады. Ал осы санаттағы кәсіпкерлік субъектілерінің мемлекеттік тіркелу немес қайта тіркелу уақыты 3 жылдан аспаса, аталған объектілерге тексеру жүргізілмейді. Іс жүзінде мұндай жағдай тексеру графигіне енгізілген жоғары топтағы сауда орындарының тексерілмеуіне алып келеді. Себебі субъект жақында ғана қайта тіркеуден өткен. Мысалы, «Сәуле» ЖШС-ға қарасты «Оптовик» сауда орталығы, «Абесов» ЖК-ға қарасты «Алаш» базары, сонымен қатар түрлі заңды тұлғаларға қарасты «Жібек жолы» базары және «Арғымақ» автокөлік базары жоғары топтағы объектілерге жатқанымен, мемлекеттік тіркеуден қайта өтулеріне байланысты жақын арада біздің тарапымыздан тексерілмейді. Себебі, қайта тіркелгеніне 3 жыл толмаған. Айта кететін жайт, сауда орындарының жетекшілері барлық өрт қауіпсіздігі талаптарын орындағандарына қарамастан, барлық сауда орындарында қазіргі таңда қайта жобалау жұмыстары (реконструкция) жүргізілуде. Осының әсерінен жаңадан салынған сауда нүктелерінің саны нормадан асып жатады және базарларда үлкен көлемде сауда-материалдық заттар жинақталып, өту жолдарына кедергі жасайды.
Сонымен қатар өртке қарсы арақашықтық та сақталмай жатады. Өртке қарсы нормалардың талаптарында сауда қоймаларына және сатуға арналған бөлмелердің арасында міндетті түрде өртке қарсы қабырға болуы тиіс. Соның арқасында өрт туындағанда бір бөлмеден екінші бөлмеге өрттің таралуы мүмкін болмай қалады. Алайда, сауда-саттық жүргізіліп жатқан базарлардың ешқайсысында өртке қарсы қабырға қарастырылмаған. Жақында ғана өртке оранған «Исатай», «Оптовик» базарларындағы мүшкіл жағдайды осының дәлелі ретінде келтіруге болады.
Шымкент қаласы әкімдігінің баспасөз қызметі
