2007 жылдан бері республикада 100 пайыз мемлекеттік тілде хабар таратып жатқан «Айғақ» телеарнасы бүгінде халықтың ыстық ықыласына бөленіп келеді. Шымкент қаласы мен мегаполиске жақын орналасқан бірқатар аудандарда таралымы жүргізіліп жатқан «Айғақты» енді рухани астананың тұрғындары да көру мүмкіндігіне ие болды. Айту керек, бұған дейін арнамыздың ақпараттарын Түркістан облысының жұртшылығы мен еліміздің көрермендері Қазақтелекомның ID tv құрылғысы арқылы тамашалап келген. Бүгіннен бастап, облыс орталығына «Айғақ» телеарнасы өз жиілігін таратып жатыр.
2014 жылы «Айғақ» телеарнасына Қазақстан Республикасының Президенті Н.Назарбаевтың Өкімімен өңірлік бұқаралық ақпарат құралдарын дамытуға қосқан үлесі, әлеуметтік-экономикалық және саяси реформаларды кеңінен жариялап, көрсеткені үшін Алғыс жарияланған болатын.
Мемлекет басшысы «Болашаққа бағдар: рухани жаңғыру» бағдарламалық мақаласында «Патриотизм кіндік қаның тамған жеріңе, өскен ауылыңа, қалаң мен өңіріңе, яғни туған жеріңе деген сүйіспеншіліктен басталады. …Туған жерге, оның мәдениеті мен салт-дәстүрлеріне айырықша іңкәрлікпен атсалысу – шынайы патриотизмнің маңызды көріністерінің бірі» деп айтып өтті. Осы мақсатта мақаладағы жалпыұлттық патриотизмнің нағыз өзегіне айналатын «Туған жер» бағдарламасын жүзеге асыру мақсатында «Ғажайып Қазақстан» және «Туған жер — құтты мекенім» атты жобаларды қолға алып, республиканың барлық мемлекеттік ұлттық табиғи паркі мен Оңтүстік Қазақстан облысының киелі мекендері туралы түсірілім жасап ел назарына ұсынып келеді. «Ұлы бабалар ізімен…» атты бағдарламалар циклі де шет мемлекеттерде мәңгілік мекенін тапқан ұлт зиялылары туралы кеңінен насихаттап отыр.
Елбасы Н.Назарбаев «Қазақстан-2050» Стратегиясы қалыптасқан мемлекеттің жаңа саяси бағыты» атты Жолдауында: «Қазақстан патриотизмнің іргетасы – барлық азаматтардың тең құқылығы және олардың Отан намысы алдындағы жалпы жауапкершілігі» деп ерекше атап өтті. Түркістан облыстық мәслихаттың депутаты, Түркістан облыстық Қоғамдық кеңестің мүшесі, Қазақ Журналистикасының қайраткері, Қазақстанның Құрметті журналисі Дулат Әбіш басқаратын «Айғақ» телеарнасының ұжымы «Мемлекет басшысының тапсырмасын орындауда ұлттық құндылықтарды қастерлеу – әрбір ұлтжанды азаматтың қасиетті борышы»- деп біледі.
«Айғақ-ақпарат».
