— Елордада қоғамдық кеңестердің ІІ Республикалық мәжілісі өтті. Еліміздегі қоғамдық кеңестің өкілдері, Азаматтық Альянс, Үкіметтік емес ұйымдар қатысқан жиналыста талқылаған мәселе аз емес. Халық пен билік ортасында көпір болып жүрген қоғамдық ұйымдар әлі де болса өзінің міндетін түсінбейді екен. Елімізде — өзекті мәселелерге бас қатырмайтын, қылмыстық оқиғаға еті үйренгендер көбейген. Астанада өткен Қоғамдық кеңестің мәжілісінде осыған қатысты пікір айтылды. Түркістан облысы мен Шымкент қаласынан өкілдер де барып, өлкенің намысын қорғап мінберде сөз сөйледі.
— Соңғы уақытта қоғамда күн сайын бір қылмыс орын алатын болды. Қаржының тапшылығы, заманның ағымы безбүйректерді көбейтті білем. Мәселен, осы аптада Шымкент қаласының қақ ортасында кәсіпкердің отбасын ойрандап кетті. Қару кезенгендер Байтұрсынов көшесінің бойында тұратын ер азаматты және оның жұбайын аяусыз өлтірген. Бірін атса, енді бірін суық қарумен пышақтаған. Елбасы кәсіпкерлерге қолдау білдіру керек деп шырылдап жүргенде, мегаполистегі бұл қылмыс елді елең еткізді. Осы жағдайға қатысты Астанадағы қоғамды кеңестің мәжілісіне қатысқандар пікір айтты
— Астанаға арнайы барып, қоғамдық кеңестің жиынында түрлі пікірге құлақ түрген әріптестеріміз көршілес Жамбыл облысынан келген өкілдермен де жүздескен. Елордада жолыққан қос тарап Асқар Мырзахметовтың іскерлігі туралы ой бөлісіпті. 2009-2015 жылдары Оңтүстік Қазақстан облысына әкім болған Асқар Исабекұлының қолтаңбасы Шымкенттің талай көшелерінде қалды. Қазір дәл сол бағытымен Жамбыл аймағын гүлдендіріп жатыр. Бұл еңбегі ескеріліп мемлекеттік награда «Парасат» орденінің иегері атанды. Міне, осыған байланысты көршілес ағайындар әріптестерімізді тоқтатып, сұхбат беріпті.
— Түркістанды «Қазақстанның рухани орталығы ретінде қалыптастыру мақсатында Бас жоспар қалада негізгі үш бағыт бойынша жүргізіледі. Киелі Түркістан шаһарындағы өткен жылы атқарылған және алдағы қызу жұмыстар бойынша Әліпбек Өсербаев халық алдында есепті кездесуін өткізді.
— Жоғары санаттағы дәрігер — хирург Мәди Бегалиевті бүгін ақтық сапарға шығарып салды. Өңтүстік өңірде алғаш рет адам ағзасына трансплантациялық ота жасап, мыңдаған адамға қайта үміт сыйлаған азаматпен қоштасуға, зиялы қауым өкілдері мен барша әріптестері келді.
— Құқықбұзушылық туралы статистикалық мәлімет бойынша, Шымкент еліміздегі «Қауіпсіз қала» деп танылған. 2017 жылы бүгінгі Түркістан облысында 8 айда тіркелген қылмыс саны 16 пайызға, яғни 22 438-ге азайған. Алайда, орын алған заңбұзушылықтың 62 пайызы Шымкент қаласында тіркелген екен. Ал, 2016 жылы мегаполисте 20 892 қылмыс орын алған. Дәл осы уақытта Астанада – 39 727, ал Алматыда 66 913 қылмыстық іс қозғалған. Аталмыш ірі қалалармен салыстырсақ, Шым шаһарындағы заңға қайшы іс-әрекеттер саны төмен. Бірақ, бүгінде қоғамда орын алып жатқан кейбір оқиғалар ойландырмай қоймайды. Осы орайда, мегаполисті қала тұрғындары қаншалықты қауіпсіз қала деп ойлайды? Әр тұрғын өзінің қауіпсіз мекенде аялдап жүргендіктерін сезіне ме? Қоғам пікіріне назар аударайық.
— Сарыағаш ауданындағы 77 білім мекемесінің 63 типтік, қалған 14-і ыңғайластырылған оқу ордасы. Соның ішінде 600 балаға шақталған №45-ші мектеп былтыр пайдалануға берілген.
— Қазақстан Респуликасының Президенті Н. Назарбаевтың «Болашаққа бағдар рухани жаңғыру» мақаласы аясында Арыс қаласында «Рухани Қазына» атты кіші жоба өз жұмысын бастамақ. Бұл бағыт аясында енді, аталған ауданда биыл киелі жерлер абаттандырылып, насихат жұмыстары тағы жандана түседі деп күтілуде. Бұл туралы, күні кеше Арыс қаласы әкімінің орынбасары Айтбек Рысдәулет баспасөз жиынында арнайы мәлімдеме жасап, стратегиялық құжат бойынша өткен жылы атқарылған жұмыстарды толығымен айтып өтті. Ұлдархан.
— Елімізде соңғы уақытта тілсіз жаудың зардабын шеккен халықтың саны азаймай тұр. Өйткені, жылыту маусымы кезінде үй ішінде табиғи газды немесе отын жағатындар бар. Осы орайда, Шымкент қаласы төтенше жағдайлар департаментінің мамандары апатты алдын алу мақсатында түсіндіру жұмыстарына кірісті. Арнайы ұйымдастырылған сенбілікке орталық мамандарынан бөлек, мемлекеттік органдардан, полиция бөлімі мен ҚазТрансГаз мекемесінің қызметкерлері қатысты. Айта кетейік, 2018 жылдың 12 айында 186 өрт оқиғасы тіркеліпті. Ал, жыл басынан бері 7 өрт оқиғасы орын алып, 2 адам қаза болған. Осы орайда, қала бойынша төтенше жағдайлар бөлімінде, сарбаздар сапқа тұрып, атқарылатын жұмыстарға қатысты нұсқаулық берілді.
— Волейболдан ерлер арасында халықаралық турнир өтті. Волейболдың аға жаттықтырушы Пердебай Мырзашүкіровтың мерейлі мерекесі қарсаңында ұйымдастырылған халықаралық сайысқа 12-ге жуық команда қатысты.
