— Рухани астанада тарихшылар бас қосты. Келелі кездесу барысында Елордасы Астана қаласының 20 жылдығына арналған «Histori of Astana» атты кітаптың тұсауы кесілді. Сонымен қатар, бұл күні Түркістанға Елтаңбаның авторы Жандарбек Мәлібеков арнайы келген. Осы ретте алғашқы латын әріпімен жазылған Елтаңбаны Қ.А. Ясауи атындағы ХҚТУ-нің ректоры Болатбек Әбдірәсіловқа тапсырды.
— Мегаполисте Шымкенттің белсенді жастарының форумы өтті. 500-ге жуық жастар қатысады деп жоспарланған шараға қатысқандар 700-ге жетті. Елге белгілі кәсіпкерлер мен спикерлер сөз сөйлеп, тәжірибелерімен бөлісті. «Профессионал» жобасын іске асыру үшін Шымкент қаласының ТОП-5 компанияларымен меморандум түзілді.
— Түркістан облыс орталығы болғалы тұңғыш рет «Көк тудың желбірегені» атты республикалық аламан айтыс ұйымдастырылды. Сүбелі сөз айтып жыр додасын қыздыратын ақындардың басын қосатын бұл жарыс бұған дейін Шымкент қаласында 3 рет өткізілген. Ұлттық өнерді насихаттауға арналған дәстүрлі шарада 10 жас ақын бақтарын сынады. Қарсыластан оза шауып сөз маржанын теріп айтқан айтыскерлер қомақты қаржыға ие болды.
— Түлкібас ауданында халықтық кеңсенің таныстырлымы өтті. Аталған орталық Цифрлы Қазақстан бағдарламасы аясында бір терезе жүйесімен халыққа ашық және қолжетімді қызмет түрлерін көрсететін болады. Кеңседе аудан әкімдігі тарапынан 8 бөлімнің мамандары орналасқан. Бұл жоба жергілікті тұрғындардың мәселесін әділ әрі дер кезінде шешуге мүмкіндік бермек.
— Егеменді мемлекет болып жарияланғанымызға биыл 27 жыл. Айтулы мерекені атап өтуді тәуелсіз ұрпақ бастап кетті. Солардың бірі достығы жарасқан Қазақстан инженерлі-педагогикалық халықтар достығы университеті. Білім ордасы Тәуелсіздіктің бастау алатын кезеңдерінен көріністер қойып, кең көлемде іс-шара өткізуде.
— Биыл егемен еліміздің еңсе тіктеп тәуелсіз ел болғанына 27 жыл толып отыр. Осыған орай «Нұр Отан» партиясы Қаратау аудандық филиалының Сайрам бастауыш партия ұйымының ұйымдастыруымен «Тәуелсіздік тұғырым» тақырыбында мерекелік іс шара өтті. Сайрам тұрғын-үй алабында орналасқан бірқатар білім беру мекемелерінің ат салысуымен өткен шара барысында жиналған көпшілікке арнап концерттік бағдарламалар ұсынылса, мерекеге орай бірқатар азаматтар көшбасшы партия филиалының арнайы алғыс хаттарына ие болды.
— Шымкенттік гимнастшылар Дубайдан жеңіспен оралды. Әлия Юсупова атындағы көркем гимнастика мектебінің бүлдіршіндері «ДуГамКап-2018» халықаралық турнирінде жоғарғы нәтиже көрсеткен. Жас жеңімпаздар бүгін Шымкент аэропортына қонып, туған жерге оралды. Қазақстанның атын әлемнің алпауыт 18 мемлекетіне танытқан 10 бірдей бүлдіршіндер 400 үміткердің арасынан топ жарған. 6 және 8 желтоқсан аралығында өткен халықаралық сайыста Диана Ералы көркем гимнастикадан 1-ші орын алып, жеке қоржынына алтын және қола медаль салған. Одан бөлек, басқа да жас гимнастшылар Дубайдан 2 алтын, 8 қола медальмен оралды.
— Бәйдібек ауданының балабақша тәрбиешілері бүлдіршіндерді жан-жақты етіп дамытудың жаңа әдістерін қолдануда. Ол үшін аудан арасында семинарлар өткізіп, біліктіліктерін арттырмақ. Бұл жолы «Айсұлу» бөбекжайында өткен семинардың ерекшелігі балаларға жыл мезгілдерінің байлықтары жайында сабақ өтіп, өзге мектепке дейінгі мекемелер қатысты.
