Еліміз үшін тұғыры биік мереке Тəуелсіздік күніне орай режиссер А. Сатаевтың»Елбасы жолы. Астана» атты Отандық фильмінің тұсаукесері өтті. Бұл картина – «Елбасы жолы» киноэпопеясының бір бөлігі. 
Шымкент сауда-ойын-сауық орталығында өткен шараға Шымкент қаласының əкімі Ғабидолла Əбдірахымов арнайы қатысты. Фильмде Ақмола қаласының Қазақстан астанасы болып іргесі қаланып, бой көтеруі баяндалған. Елбасының сара жолын саралаған фильм барша көрерменнің жүрегінен ерекше орын алды. Фильм желісінде 1994 жылғы шілде айында ел астанасын Алматыдан Ақмолаға көшіру туралы қабылданған маңызды шешімге байланысты оқиғалар көрсетіледі. Мемлекет басшысының Астана қаласын салуға бар күш-жігерін сарп етіп, кездескен қиындықтарға мойымай қадамын алға қарай нық баса түскені жайында өрбиді.
Ұлт Көшбасшысының елдің еңсесін тіктеп, мəртебесін көтеруде алдына мақсат қойып соған жетуді көздегені аса шеберлікпен сомдалған. Сондай-ақ, ерекше атап өтетін жайт, мықты бір күш Елбасыны алға қарай жетелейді бұл фильмде. Ол өзінің жүрек түкпіріндегі сенімі. Сенімі мен патриоттық сезімі болаттай берік болған Нұрсұлтан Əбішұлы бос жатқан жерде үлкен қаланың құрылысына кіріседі. Бірақ осы тұста алдынан талай кедергілер кездесіп, керітартпалар Елбасының бұл сеніміне аса күмəнмен қарап, биліктен біразы бас тартады. Оңайға соқпаған тап осы сəтте Елбасының түсіне анасы кіріп, берік сенімнің отын қайта жағып, арқасын қағады. Мұнан соң Мемлекет басшысы одан əрі жігерлене түседі. Бойына рух пен жігер сыйлаған бұл түсі Астана қаласының іргесінің қалануына сеп болады. Өзі құрылыстың басы қасында жүріп, бүкіл Қазақстан болып қаланы əсем етіп тұрғызады. Қазақстанның қазіргі күнге жетуі, Астананың көркейіп гүлденуі сонау 1994 жылдары салған Елбасының дара ізі. Кинокартинада сол кездегі Нұрсұлтан Әбішұлының үлкен сенімі, асқақ арманы мен рухының мықтылығы аса көркемділікпен бейнеленген. Отандық фильмнің əсіресе жастарға берері мол. Киноны көре отырып әрбір адам ерекше рухани сезімге бөленіп, патриоттық жігер алады десек артық айтқандық емес. Бір елдің тағдырын бір жолға қоя білген Ұлт Көшбасшысының нағыз ерлігі шынайы көрсетілген. Фильмді көріп түйінделетін ой, ол жалпы əрбір адамзатта сенім мықты болып Отанға деген сүйіспеншілігі шынайы болса нəтижесінде өте үлкен жетістікке жетеді. Демек сенім — ол бұзылмайтын қамалды алатын сезім күші. Ал, патриоттылық рух ол адами құндылықтардың ең асылы. Сондай-ақ, бұл фильмде армандар орындалады деген рас екендігіне көз жеткіземіз. Əр адам шын ықыласпен армандап, алдына мақсат қоя білсе, нәтижесінде ол міндетті түрде жеңіске жетеді!
Малика Маратқызы.
