Ауыл шаруашылығы министрінің Шымкентке жасаған сапары әкімшілік-ғимаратында өткен бас қосуға жалғасты. Вице-Премьер Елбасының 5 қазанда қазақстандықтарға арнаған кезекті Жолдауын негізге ала отырып, жыл бойы атқарылған жұмыстармен таныстырды. 
Министрдің мәлімдеуінше, қазір Қытай нарығында көптеген ауыл шаруашылық өнімдері сұраныста. Ірі қара малды және ұсақ малды Сауд Арабиясы мен Біріккен Араб Әмірліктеріне, ет өнімдерін, тауық жұмыртқасын жеткізуге қойылған шектеулер алынды. Нәтижесінде, агроөнеркәсіптік кешен өнімнің 9 айдағы экспорты 28 пайызға ұлғайды.
Қазіргі уақытта ветеринарлық және фитосанитарлық талаптарды үйлестіру, техникалық реттеу саласындағы заңнаманы үйлестіру және көршілес елдердің нарықтарына жүйелі жұмыс жүргізілуде. Соның нәтижесінде, Иран тараптарымен тірі қойды, тоңазытылған әрі салқындатылған қой етін, сиыр етін, тағамдық жұмыртқаны жеткізуге арналған ветеринарлық талаптар келісілді. Ал, осы жылы тірі ірі қара малға қойылатын талаптарды келісу жоспарлануда.
Өмірзақ Шөкеевтің айтуынша, Елбасы тапсырмасына сәйкес ауыл шаруашылық саласында, экспорт көлемін ұлғайту мақсатында түрлі жобалар жүзеге асырылып, тіпті қосымша бюджеттен қаржы да бөлінген. Артық субсидиялар саны да кеміді. Тек жұмысқа жауапкершілікпен қарауды сұрап отыр. Мәжіліске қатысқан Шымкент қаласының әкімі Ғабидолла Әбдірахымов та бірқатар жаңалықтармен бөлісті. Келер жылдан бастап «Су ресурстары маркетинг» ЖШС тарифтік құнын 10 пайызға төмендетсе, Оңтүстік Жарық Транзит 3,5 пайызға, ҚазТрансГаз 3,3 пайызға арзандататын болды. Мәжіліс барысында пікір алмасқан қоғам белсенділері министрге көкейдегі сұрақтарын қойды. Елбасының Жолдауын қолдап, тапсырма негізінде жұмыс атқарып жатқандарды ардагер журналист Қонысбек Байділда да бірігіп, Ұлт көшбасшысының сенімін ақтауға шақырды.
Брифинг соңында Өмірзақ Шөкеев те, Ғабидолла Әбдірахымов та Елбасы жүктеген міндеттерді жоғарғы деңгейде орындауға сөз берді. Ел азаматтары мемлекеттің дамуына маңызды жоспарлар әзірлеп, мәжіліске қатысушыларды да өз жұмыстарына жауапкершілікпен қарауды сұрады.
Тоғжан Нарбай.
