Жаңалықтар. 19 қараша, 2018 жыл.

— Түркістан облысы әкімдігі мен Халықаралық Түркі академиясы арасында іскерлік байланысты нығайту бағытындағы  Меморандумға қол қойылды. Енді Түркістан қаласында Халықаралық Түркі Академиясының ғылыми орталығы ашылатын болады. «Киелі Түркістан және Түркі дүниесінің рухани жаңғыруы» тақырыбында өткен ғылыми-теориялық конференцияда Түркістан облысының әкімі Жансейіт Түймебаев және шетелден келген бірқатар ғалымдар да Вильгелм Томсен медалімен  марапатталды.

Мақтаарал ауданының құрылғанына 90 жыл. Дегенмен, тарихы әрден басталатын  ақ алтынның отаны 2018 жылдың 5 маусымында Елбасы Жарлығымен екі ауданға қайта бөлінген болатын. Халық саны 135 мыңды құрайтын Мырзашөл өңірінің тұрғындары үшін бұл күні ұлан асыр той. Аудан орталығында ұйымдастырылвған азық-түлік жәрмеңкесі, эстрада әншілерінің қатысуымен өткізілген мерекелік концерт көптің көңіліне қуаныш сыйлады.

  — Жастарға орта арнаулы кәсіптік білім беріп келе жатқан Қазығұрт ауданындағы №11 колледждің құрылғанына биыл 60 жыл толып отыр. Яғни 1958 жылы негізі қаланған оқу ордасы сол кезеңнен бері ауданға қажетті қарапайым жұмысшы мамандарын даярлап келсе, білім мекемесін бүгінге дейін 25 мыңға тарта кәсіптік маман иелері бітіріп шыққан.  Осы орайда өнегелі білім ұясының 60 жылдық мерейтойына орай арнайы мерекелік іс- шаралар ұйымдастырылса, облыстың түкпір түкпірінен келген қонақтар қолледж ұжымының қуанышына ортақтасты.

—  Өткен апта басында Елордамыз Астана қаласында, алғаш рет бастауыш партия  ұйымдарының форуым өтіп, негізгі тұжырымдамасы қабылданған еді.   Жалпы, партияның ірге тасы және басты күші — бастауыш партия ұйымдары болып табылғандықтан,  жұмысы салмақты болуы қажет. Осыған орай бүгін, «Нұр Отан» партиясы Шымкент қалалық  филиалының ұйымдастыруымен, арнайы жиын өтті. Оған,  көшбасшы партиясы ұйымдарының төрағалары қатысып,   технологияларды жетілдіру сондай-ақ  жастармен белсенді жұмыс жасауды алға тартты.