Жазушы Әбжапар Жылқышиевтың туғанына — 100 жыл!

Жазушы Әбжапар Жылқышиевтың көзі тірі болғанда биыл 100 жасты еңсерер еді. Атадан туған ардақты ер 1918 жылдың 15 қарашасы күні Жамбыл облысы, Луговой ауданында дүниеге келген. Еңбек жолы партияда қызмет етуден басталған. Келес, Ильичев, Георгивка, Алғабас аудандарында басшылық қызметтерді атқарып, Шымкент облыстық партия комитеті жанындағы партия комиссиясының төрағасы болды. Ұлы Отан соғысына қатысып, Берлинге дейін фашистерді қайтарған қаһарман. Міне, осындай дара тұлғаға еліміздің үшінші мегаполисі Шымкенттен естелік тақтайша қайтадан жаңартылды. Әбжапар Жылқышиев көшесінен орын алған естелік тақтайша ұрпаққа ой салып тұр.

Майдан даласын көрген жауынгер жазушының кітаптарын парақтап, оқып шықсаңыз Кеңес Одағы солдатының рухы қонғандай күй кешесіз. Өмірде болған оқиғаны суырып алып, шұрайлы тілмен оқырманға адам тағдырының сан қырын жеткізген алғашқы кітабы «Ақтолқын». Жазушы әдебиетке кеш келгенімен бірталай кітапты жарыққа шығарып үлгерді. Мемлекеттік қызметтің талай сатысынан өткен азамат билік жағында емес, халықтың жанынан табылды. Сабырлы, сабаз қалпынан танбаған Әбжапар Жылқышиев бүгінгі ұрпаққа нағыз үлгі тұлға.

Әбжапар Жылқышиевті ұмытпаған ұрпағы көше бойынан жаңартылған естелік тақтайшаның маңайына жиылды. Көзін көрген замандастары, ұл-қыздарымен еңбек еткен белгілі азаматтар төбе көрсетті. Әке абыройымен мақтанған қоғам қайраткері Болат Жылқышиев бұл күні толқып жүрді. Бас иіп келген қауымға алғыс айтып, «Айғақ» телеарнасының тілшілерімен сезімін бөлісті. «Менің әкем, мен үшін ұлы тұлға болса, өзгелер үшінде ұмытылмас азамат екендігі көңілімді көтеріп, мерейімді асырып тұр. Балаға осыдан өткен қуаныш жоқ болар сірә!» — дейді Болат Жылқышиев.  Әбжапар Жылқышиев 1995 жылы дүниеден озған. Қазіргі таңда Шымкент қаласындағы «Қасқа» зиратында жатыр. Бұл күні «Айғақ» телеарнасының басшысы, халық қалаулысы Дулат Әбіш бастаған түсірілім топ жазушының бейітіне барып, рухына құран бағыштады. Гүл шоқтарын қойып еске алды.

Туған жердің киесі дарыған Әбжапар Жылқышиев жан бақпаған, ар баққан тұлға!

Бағлан Байкөбекқызы.