Шымкент қаласында апатты мектептер жоқ, алайда үш ауысымды 19 мектеп бойынша қосымша 16 138 орынға қажеттілік бар. Осы және өзге де мәселелер мегаполисте «Нұр Отан» партиясы қалалық филиалының кезекті XXXV есеп беру-сайлау конференциясында айтылды. Күн тәртібінде бірнеше мәселелер қаралып, Елбасы жолдауын Шымкент қаласында жүзеге асыру барысы да талқыланған болатын. Бұдан өзге басқарма басшылары жыл бойы атқарылған жұмыстарға есеп беріп, даму жолында түзілген жоспарларымен таныстырды. 
Шымкентте «Нұр Отан» партиясы қалалық филиалының кезекті XXXV есеп беру-сайлау конференциясы өтті. Онда партияның Шымкент қалалық филиалының төрағасы Ғ.Әбдірахымов, төрағаның бірінші орынбасары Б.Нарымбетов, мәслихат хатшысы Ғ.Ташқараев пен партия ұйымдарының басшылары қатысты. Конференцияда Елбасының Қазақстандықтарға арнаған кезекті Жолдауын баса назарға ала отырып, Шымкент қаласы білім басқармасының басшысы Ақерке Абылайхан баяндама оқыды. Оның айтуынша, қазір Шымкент қаласында апатты мектептер жоқ, алайда үш ауысымды мектеп бойынша қосымша 16138 орынға қажеттілік бар. Бұл мәселе қосымша құрsлыс ғимараттарын салу, бос тұрған ғимараттарды қолдану, жаңа мектер ашумен өз шешімін таппақ. Инвесторлар алдағы уақытта 8 мектептің құрылысын бастауды жоспарлап отыр. Қазір 12 мектептің құрылыс жобалары бекітілуде.
Сонымен қатар, Шымкент қаласы отбасы, балалар және жастар саясаты басқармасының басшысы Жандос Қалтаев жастар саясатының дамуы және шет елдік жастардың үздік ғылыми жобаларын Шымкент қаласында жүзеге асыру жолдарын өз баяндамасында таныстырды. Қазіргі таңда Мегаполисте 14-29 жас аралығында 241 433 жастар бар. Елбасының келер жылды Жастар жылы деп жариялауына байланысты, қазіргі уақытта Шымкент қаласында 9 жоба жүзеге асырылуда. Мәселен, «Шымкент жастары» жобасы. Ол жастар ұйымдарын дамыту және олардың спорт, ғылым, мәдениет, әскер-париоттық тәрбие бер бағытындағы бастамаларға қолдау көрсетеді.
«Атамекен» ұлттық кәсіпкерлер палатасы Шымкент қалалық филиалының директоры Асқар Әбубакиров «Экспортқа бағытталған индустрияландыру» мәселесі жайлы өз баяндамасында мәлімдеді. Оның айтуынша, Шымкент қаласынан өнімдерді сыртқа экспорттау пайызы бұл жылы 2,4% құрап отыр. Бұл көрсеткіш 2005 жылы 3 % болатын. Жыл сайын Мегаполистен өнімді экспорттау пайыз мөлшері азайып жатқандығын Асқар Әбубакиров алға тартты.
Аталмыш конференцияда, «Нұр Отан» партиясы Шымкент қалалық филиал төрағасының бірінші орынбасары партияның 2017-2018 жылдар аралығында атқарылған жұмыстарға есеп берді. Мегаполистегі партия есебінде 20308 Партия мүшелері бар. Бүгінде олардың әрбірі ұлттың дамуына, қоғамның алға жылжуына жұмыс істеп жатқандығын айтты. Сондай-ақ, Сыбайлас жемқорлықтың алдын алу шараларын қолдау мақсатында, 40 отырыс өткізілген. «Нұрлы жер», «Нұрл жол» бағдарламасы аясында да бірқатар отырыстар өткізілгендігін мәлімдеді.
Конференция соңында қала әкімі Ғабидолла Әбдірахымов басқарма басшыларына тапсырма беріп, оның орындалуын талап етті. Сонымен қатар, өз тарапынан бірнеше ұсыныстарын да жеткізді. Мәселен, Шымкенттегі балалар теміржолы. Бұл- көптің көңілінде жүрген мәселе екендігін айтып, мұны көп болып кеңесіп шешуді жөн санады. Ол жерге балалардың қауіпсіздігін алаңдатпай, веложол салуды да жоспарға алып отыр. Және конференцияға қатысушыларды Елбасының Жолдауы негізінде жұмылып, жұмыс жасауға шақырды.
Тоғжан Нарбай.
